សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សមត្ថកិច្ចឃាត់ខ្លួនសន្តិសុខក្រុមហ៊ុន MPA ម្នាក់ បន្ទាប់ពីប្រើហិង្សាវាយទៅលើសន្តិសុខក្នុងផែស្ងួតដូចគ្នា ព្រោះតែរឿងចាក់ធុងបាស់ ។
ហេតុការណ៍នេះបានកើតឡើលកាលពីវេលាម៉ោងរំលងអធ្រាត្រ ឈានចូលថ្ងៃសុក្រ ៨រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៩ ខែមីនា ឆ្នាំ២០១៨ នៅចំណុច ក្នុងផែស្ងួតតេងឡាយ ផ្លូវអូឌឹមកប់ស្រូវ ស្ថិតនៅភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ ។
ជនរងគ្រោះមានឈ្មោះ ញ៉ឹក ភារី ភេទប្រុស អាយុ៤៩ឆ្នាំ មុខរបរសន្តិសុខ យាមផែស្ងួត ស្នាក់នៅភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ។ ជនបង្កឈ្មោះនឹម ថេន ភេទប្រុស អាយុ២៣ឆ្នាំ មុខរបរសន្តិសុខ យាមនៅផែស្ងួតជាមួយគ្នា ស្នាក់នៅផ្ទះជួល សង្កាត់កំបូល ខណ្ឌពោធិ៍សែនជ័យ ។
តាមប្រភពព័ត៌មានពីជនរងគ្រោះបាននិយាយប្រាប់ថា នៅមុនពេលកើតហេតុឈ្មោះនឹម ថេន បានចាក់ធុងបាស់នៅកន្លែងយាមក្នុងផែស្ងួតឮសម្លេងខ្លាំងរំខានពេក បន្ទាប់មកគាត់បានទៅឃាត់ថា កុំចាក់ឮពេកបើកស្តាប់តែគ្នាឯងនឹងទៅបានហើយ ។ ស្រាប់តែជនបង្កខាងលើ បានជេរជនរងគ្រោះដោយប្រើពាក្យសម្តីមិនសមរម្យ ហើយនៅពេលនោះដែរ ជនរងគ្រោះបានជេរតបទៅវិញភ្លាមនោះ ស្រាប់តែជនបង្កបានស្ទុះទៅយកបំពង់ទីបមកវាយទៅលើជនរងគ្រោះចំនួន៧បំពង់ទីបបណ្តាលឲ្យជនរងគ្រោះបែកក្បាល និងបាក់ដៃខាងឆ្វេងរងរបួសធ្ងន់ ។
ក្រោយពេលកើតហេតុជនរងគ្រោះបានទូរស័ព្ទប្តឹងសមត្ថកិច្ចឲ្យជួយអន្តរាគមន៍ ហើយនាំជនបង្កខាងលើទៅសាកសួរនៅប៉ុស្តិ៍នគរបាលរដ្ឋបាលត្រពាំងក្រសាំង ហើយជនរងគ្រោះទាមទារសំណងចំនួន៣ពាន់ដុល្លារ តែជនបង្កអត់មានលុយសងកម្លាំងនគរបាលប៉ុស្តិ៍ត្រពាំងក្រសាំងបានកសាងសំណុំរឿងបញ្ជូនទៅជំនាញព្រហ្មទណ្ឌខណ្ឌពោធិ៍សែនជ័យចាត់ការតាមនីតិវិធី ៕ សុខាសែនជ័យ
