រថយន្តកុងតឺន័របុកជាមួយរថយន្តដឹកសិស្សសាលាគៀបជាប់មនុស្ស២នាក់រងរបួសធ្ងន់

ភ្នំពេញ៖ មនុស្សចំនួន២នាក់បានគៀបជាប់ក្នុងការប៊ិនរថយន្ត រងរបួសធ្ងន់ ត្រូវបានបញ្ជូនទៅសង្គ្រោះភ្លាមៗ ដោយជួបគ្រោះថ្នាក់ចរាចរណ៍ រវាងរថយន្តដឹកសិស្សសាលាអន្តរជាតិគីហ្សូណា បុកជាមួយ កុងតឺន័រ។

ហេតុការណ៍នេះបានកើតឡើងនៅម៉ោង៤និង៣០នាទីទៀបភ្លឺ ថ្ងៃចន្ទ ៣កើត ខែចេត្រ ឆ្នាំ រកា នព្វស័ក ព.ស.២៥៦១ ត្រូវនឹងថ្ងៃទី១៩ ខែមីនា ឆ្នាំ២០១៨ មុខបុរីញូថោនអូរឌឹម ផ្លូវជាតិលេខ៤ សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មានបានឲ្យដឹងថា មុនពេកកើតហេតុគេឃើញរថយន្តសាំយ៉ុង ជា រថយន្តដឹកក្មេងសិស្សសាលាអន្តរជាតិគីហ្សូណា ស្លាកលេខ ភ្នំពេញ 2AN-5507 បើកតាមផ្លូវជាតិលេខ៤ពីលិចទៅកើតយ៉ាងលឿន ដល់ចំណុចកើតហេតុស្រាប់តែមានរថយន្តកុងតឺន័រ ពណ៌ស ដែលធ្វើដំណើរបញ្ច្រាសទិសគ្នាហើយបានបុកចំពីមុខពេញទំហឹងបណ្តាលឲ្យមនុស្ស២នាក់ ដែលជិះក្នុងរថយន្តសាលាអន្តរជាតិគីហ្សូណាគៀបជាប់ក្នុងកាប៊ីន របួសធ្ងន់ត្រូវបានគេជួយគាស់យកចេញ និងបញ្ជូនទៅសង្គ្រោះនៅមន្ទីរពេទ្យតែម្តង។

ក្រោយកើតហេតុសមត្ថកិច្ចមូលដ្ឋានបានចុះទៅដល់ចំណុចកើតហេតុនិងវាស់វែងយករថយន្តទាំង២គ្រឿងទៅរក្សាទុកនៅអធិការដ្ឋាននគរបាលឋណ្ឌពោធិ៍សែនជ័យរង់ចាំដោះស្រាយពេលក្រោយ ៕ សុខាសែនជ័យ