សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងជំនាញនៃកងរាជអាវុធហត្ថរាជធានីភ្នំពេញ សហការណ៍ជាមួយ មូលដ្ឋានអាវុធហត្ថ ខណ្ឌសែនសុខ, ខណ្ឌដូនពេញ និង ខណ្ឌឫស្សីកែវ តាមប្រមាញ់ចាប់បាន តាមអំណាច ដីកាបញ្ជាឱ្យចូលខ្លួន របស់លោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចុះថ្ងៃទី១៤ ខែមីនា ឆ្នាំ២០១៨ លេខ០៨៣/២០១៨ អ.យ.ឋ និង ០៨៤/២០១៨ អ.យ.ឋ ឃាត់ខ្លួនឃាតករ២នាក់ ក្នុងករណី ប៉ុនប៉ងឃាតកម្ម (បច្ចុប្បន្នជនរងគ្រោះបានស្លាប់) ។
ជនសង្ស័យទី១. ឈ្មោះ ចាន់ វ៉ាន់ណូ ភេទប្រុស អាយុ២៥ឆ្នាំ មុខរបរសន្ដិសុខ ត្រូវបានកម្លាំងកងរាជអាវុធហត្ថ ឃាត់ខ្លួននៅចំណុចមុខ សាលាអន្តរជាតិផ្លេននីង ផ្លូវលេខ៧៥ សង្កាត់ស្រះចក ខណ្ឌដូនពេញ រាជធានីភ្នំពេញ ។ និងជនសង្ស័យទី២. ឈ្មោះ ចាន់ វ៉ាន់ណេត ហៅម៉ាប់ ភេទប្រុស អាយុ២៦ឆ្នាំ មុខរបរបើកបរ ត្រូវបានកម្លាំងកងរាជអាវុធហត្ថឃាត់ខ្លួន នៅចំណុច ផ្លូវបេតុង រោងចក្រសាំផាន់ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ។
មន្រ្តីកងរាជអាវុហត្ថ បានឲ្យដឹងថា អស់រយៈជិត០៣ខែមកហើយ ដែលជនល្មើស២នាក់ ជាឃាតករបានសម្លាប់មនុស្ស កាលពីយប់ម៉ោង១និង១០នាទីរំលងអធ្រាត្រ ឈានចូល២៦ ខែធ្នូ ឆ្នាំ២០១៧ នៅចំណុច ភូមិសែនសុខ៤ សង្កាត់ឃ្មួញ ខណ្ឌសែនសុខ។ ក្នុងករណីបើកការប្រយុទ្ធមួយកើតឡើង រវាងក្រុមក្មេងទំនើង២ក្រុម ប្រដាប់ដោយ ដាវ ដំបង ដុំថ្ម បណ្តាលឲ្យជនរងគ្រោះ០២នាក់រងរបួសធ្ងន់ បញ្ជូនទៅមន្ទីរពេទ្យ និងស្លាប់ម្នាក់ព្រោះរបួសធ្ងន់ធ្ងរ មិនអាចសង្គ្រោះបាន ។ចំណែកជនដៃដល់រត់គេចខ្លួនបាត់រហូត ។
ជនរងគ្រោះទាំង២នាក់មានឈ្មោះ ១. ហេង ចិត្តា ភេទប្រុស អាយុ ២៥ឆ្នាំ មុខរបរ កម្មករសំណង់ ស្នាក់នៅផ្ទះលេខ៣១៩ ភូមិ សែនសុខ ៥ សង្កាត់ ឃ្មួញ (របួសធ្ងន់មិនអាចសង្គ្រោះបាន ក៏បណ្តាលឲ្យស្លាប់) ២.ឈ្មោះ ប្រាក់ សុខុន ភេទ ប្រុស អាយុ ២៥ឆ្នាំ មុខរបរបុគ្គលិករដ្ខាក រទឹកស្នាក់នៅ កន្លែងកើតហេតុខាងលើ (របួសមាត់ដេរ១០ថ្នេរ, ម្រាមដៃឆ្វេងដេរ១០ថ្នេ និង ម្រាមដៃស្តាំដេរ០៥ថ្នេរ)។
ចំណែកឯឃាតករដៃដល់ បានរត់គេចខ្លួនបាត់ស្រមោលតាំងពីថ្ងៃកើតហេតុ រហូតដល់ថ្ងៃសៅរ៍ ១កើត ខែចេត្រ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១៧ ខែមីនា ឆ្នាំ២០១៨នេះ ក៏ត្រូវកម្លាំងកងរាជ អាវុធហត្ថរាជធានីភ្នំពេញ ស្រាវជ្រាវតាមប្រម៉ាញ់ចាប់បាន និងបញ្ជូនឲ្យអធិការខណ្ឌសែនសុខដែលជាម្ចាស់ករណី ។
បច្ចុប្បន្នជនសង្ស័យខាងលើកំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌសែនសុខ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់ ៕ ស តារា
