សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ យុវជនម្នាក់បានដើរស្រែកឡូឡារកប្រពន្ធដែលធ្វើការនៅហាងមួយកន្លែង ស្រាប់តែមានបុរសម្នាក់ ដើរចេញពីក្នុងហាង THE CONNER 136 ដកកាំភ្លើងបាញ់គំរាមយុវជននោះចំនួន២គ្រាប់ បង្កការភ្ញាក់ផ្អើលនាវេលាទៀបភ្លឺបន្ទាប់ពីកើតហេតុរួចជនសង្ស័យដែលបាញ់បោះសេរីបានឡើងម៉ូតូជិះគេចខ្លួនបាត់ស្រមោល (ប៉ុន្តែករណីនេះ សមត្ថកិច្ចបានបដិសេធ)។
ហេតុការណ៍នេះ បានកើតឡើងកាលពីជិតម៉ោង៥ទៀបភ្លឺថ្ងៃពុធ ១១រោច ខែចេត្រ ឆ្នាំរកា នព្វស័ក ព.ស២៥៦១ ត្រូវនឹងថ្ងៃពុធ ១១រោច ខែចេត្រ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី១១ ខែមេសា ឆ្នាំ២០១៨ នៅខាងមុខហាង The Conner 136( ប្លុក Bar បារាំង) តាមបណ្ដោយផ្លូវលេខ១៣៦ កែងផ្លូវលេខ៥ ស្ថិតក្នុងសង្កាត់ផ្សារកណ្ដាលទី១ ខណ្ឌដូនពេញ រាជធានីភ្នំពេញ ។
ប្រភពពត៌មាននៅកន្លែងកើតហេតុបានឲ្យដឹងថា ជនរងគ្រោះដើររកប្រពន្ធ ដែលរងការបាញ់គំរាមនោះ មានឈ្មោះ ឈាវ វណ្ណា អាយុ២៤ឆ្នាំ មុខរបរកឹបសំបុត្រម៉ូតូ ស្នាក់នៅក្បែរកន្លែងកើតហេតុ។
សាក្សីដែលឃើញហេតុការណ៍ផ្ទាល់ ប្រាប់ឲ្យដឹងថា នៅមុនពេលកើតហេតុ គេឃើញមានយុវជនម្នាក់ ដើរសួររកប្រពន្ធ ដែលធ្វើការនៅហាងមួយកន្លែងជិតចំណុចកើតហេតុ ដោយបានស្រែកឡូឡា។ លុះមួយសន្ទុះក្រោយមក ក៏មានបុរសម្នាក់ បានដើរចេញពីក្នុងហាង THE CONNER 136 មកសួរនាំគាត់ ហើយគាត់បានឆ្លើយថា “ខ្ញុំមករកប្រពន្ធតើបង តែរកមិនទាន់ឃើញទេ” ហើយគាត់ក៏សួរបុរសរូបនោះ(ជនដៃដល់) “មានឃើញប្រពន្ធខ្ញុំទេ?”។ ស្រាប់តែបុរសរូបនោះ ដកកាំភ្លើងខ្លីដែលសៀតនៅចង្កេះ បាញ់ឡើងលើមួយគ្រាប់ ដើម្បីគំរាមជនរងគ្រោះ តែជនរងគ្រោះស្រែកថា “ថីបានបងឯងបាញ់ខ្ញុំ? ខ្ញុំមករកប្រពន្ធខ្ញុំទេ”។ ភ្លាមនោះ បុរសរូបនោះក៏បានបាញ់មួយគ្រាប់ទៀត ដើម្បីគំរាមជនរងគ្រោះ រួចឡើងជិះម៉ូតូមួយគ្រឿងម៉ាក SL ពាក់ស្លាកលេខ ភ្នំពេញ 1J-2713 ចេញទៅបាត់ បង្កការភ្ញាក់ផ្អើលទាំងព្រឹកព្រលឹមតែម្ដង។
បន្ទាប់ពីកើតហេតុករណីផ្ទុះអាវុធរួច គេបានរកឃើញសម្បកគ្រាប់ចំនួន២គ្រាប់ នៅកន្លែងពិតប្រាកដមែន ប៉ុន្តែកម្លាំងនគរបាលប៉ុស្តិ៍ផ្សារកណ្ដាលទី១ មិនព្រមឲ្យក្រុមអ្នកសារព័ត៌មាន សាកសួរនោះទេ ដោយមន្ត្រីនគរបាលមួយរូប បានអះអាងថា អត់មានផ្ទុះអាវុធនោះទេ គ្រាន់តែជាករណីប្ដីឈ្លោះគ្នាជាមួយប្រពន្ធសោះ ចាំបាច់សួរនាំអីច្រើនទេ រួចក៏នាំជនរងគ្រោះចូលក្នុងប៉ុស្តិ៍បាត់ទៅ។
ក្រោយកើតហេតុ សមត្ថកិច្ចបានត្រឹមតែប្រមូលគ្នាទៅកន្លែងកើតហេតុ រួចក៏ត្រឡប់មកវិញបាត់អស់ទៅ។ ទើបជនរងគ្រោះ បានត្រឹមតែជិះម៉ូតូឌុបទៅដាក់ពាក្យបណ្ដឹងនៅប៉ុស្តិ៍នគរបាលផ្សារកណ្ដាលទី១ ប៉ុណ្ណោះ៕ ជ្រោយពេជ្រ
