សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: រថយន្តធុនធំមួយគ្រឿង បើកបោះពួយយ៉ាងលឿន រួចក៏រេចង្កូតទៅបុកស្លាកប៉ាណូរបស់ធនាគារកាណាឌីយ៉ា បណ្តាលឲ្យរងការខូចខាត ចំណែកអ្នកបើកបររថយន្តបានរត់គេចខ្លួនបាត់ស្រមោល។
ហេតុការណ៍នេះកើតឡើងកាលពីម៉ោងជិត១០យប់ ថ្ងៃទី២ ខែឧសភា ឆ្នាំ២០១៨ នៅតាមបណ្តោយផ្លូវណតប្រ៊ីត ខាងមុខធនាគារកាណាឌីយ៉ា ក្បែរនឹងស្ពានអាកាសស្តុបផ្សារដីហុយ ស្ថិតក្នុងសង្កាត់ទឹកថ្លា ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់បើកបររថយន្តមួយគ្រឿងម៉ាក ហ៊ីយ៉ាន់ដាយ ពណ៌ស ជាប្រភេទរថយន្តបីភ្លៅដឹកដែក ពាក់ស្លាកលេខ តាកែវ3A-1851 ដោយធ្វើដំណើរតាមបណ្តោយផ្លូវណតប្រ៊ីត ក្នុងទិសដៅពីជើងទៅត្បូងយ៉ាងលឿន។ ខណៈមកដល់ចំណុចកើតហេតុស្រាប់តែរេចង្កូតទៅខាងស្តាំបុកស្លាកប៉ាណូរបស់ធនាគារកាណាឌីយ៉ា ដែលនៅលើខឿនចិញ្ចើមផ្លូវបណ្តាលឲ្យបាក់ទ្រេត។ ចំណែកឯរថយន្តរងការខូចខាតផ្នែកខាងមុខស្ទើរទាំងស្រុង។ រីឯតៃកុងរថយន្តបានបើកទ្វាររថយន្តចុះរត់គេចខ្លួនបាត់ស្រមោល។
បន្ទាប់ពីកើតពេលកើតហេតុសមត្ថកិច្ចមូលដ្ឋានបានចុះមកដល់កន្លែងកើតហេតុ និងមានតំណាងភាគីខាងរថយន្តបង្កបានចេញមុខមកដោះស្រាយជាមួយនិងភាគីខាងតំណាងធនាគារ។ ដោយភាគីខាងរថយន្តព្រមធ្វើការជួសជុលស្លាកប៉ាណូឲ្យខាងភាគីធនាគារវិញដើម្បីបញ្ចប់រឿងនៅនឹងកន្លែងកើតហេតុ ៕ ជ្រោយពេជ្រ
