សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យ២នាក់ បានធ្វើសកម្មភាពឆក់កាបូបស្ពាយពីនារីម្នាក់បានសម្រេច ខណៈដែលរូបនាងបានជិះម៉ូតូតែម្នាក់ឯង កាលពីវេលាម៉ោង៨និង៣០នាទីយប់ ថ្ងៃសុក្រ ១១កើត ខែជេស្ឋ ឆ្នាំច សំរិទ្ធស័ក ព.ស២៥៦២ ត្រូវនឹង ថ្ងៃទី២៤ ខែឧសភា ឆ្នាំ២០១៨ តាមបណ្តោយផ្លូវទំនប់៧០កែងផ្លូវ៦០៨ ស្ថិតនៅក្នុងសង្កាត់បឹងកក់១ ខណ្ឌទួលគោក ដោយបាត់បង់អស់ទូរស័ព្ទដៃ២គ្រឿង និងលុយមួយចំនួនផងដែរ ។
តាមប្រភពព័ត៍មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញនារីរងគ្រោះ បានជិះម៉ូតូមួយគ្រឿងម៉ាកហុងដា ស្គូពី ពណ៌ខៀវលាយលឿង ទើបតែចេញមកពីញុំាអាហារជាមួយមិត្តភក្តិនៅម្តុំទួលគោក ក្នុងគោលបំណងទៅផ្ទះនៅម្តុំទួលសង្កែ ។ លុះជិះបានកណ្ដាលផ្លូវជាចំណុចកើតហេតុខាងលើ ស្រាប់តែលេចមុខជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរី២០១៨ មិនចាំស្លាកលេខ តាមពីក្រោយភ្លាមនោះជនសង្ស័យម្នាក់ដែលអង្គុយពីក្រោយជាអ្នកធ្វើសកម្មភាពឆក់កាបូបពីនារីរងគ្រោះបានសម្រេច ហើយជិះម៉ូតូគេចខ្លួនបាត់ស្រមោល ។ចំណែកនារីជនរងគ្រោះដួលម៉ូតូរងរបួសស្រាល ។
ក្រោយពេលកើតហេតុ នារីរងគ្រោះបានទៅដាក់ពាក្យបណ្តឹងនៅប៉ុស្តិ៍បឹងកក់១ ដើម្បីឲ្យសមត្ថកិច្ចតាមស្រាវជ្រាវតាមចាប់ជនសង្ស័យមកផ្តន្ទាទោសទៅតាមផ្លូវច្បាប់ ។ចំណែកសម្ភារៈបាត់បង់នៅក្នុងកាបូបស្ពាយរបស់នារីរងគ្រោះនោះមាន ៖ ទូរស័ព្ទដៃ២គ្រឿង មួយគ្រឿងម៉ាក iPhone 6 មួយគ្រឿង និងមួយគ្រឿងទៀតម៉ាកសាំងសុង និងលុយមួយចំនួនផងដែរ ៕ ស តារា
