សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ហេតុការណ៍មិនធ្លាប់មានមួយបានកើតឡើង ខណៈមានស្ត្រីពីរនាក់ស្រឡាញ់គ្នាគ្មានអ្វីព្រាបបានប៉ះមិនដាច់ជាងស្កតាំងម៉ែដោយដើរតួជាប្តីប្រពន្ធរួមសុខទុក្ខ និងគ្នាតែបែរជាឪពុកម្តាយខាងស្រីមកបំបែក ព្រោះចង់ឲ្យកូនស្រីមានអនាគតល្អ ហើយបានមកចាប់ដឹកតាមរថយន្តទៅផ្ទះវិញ ។
ហេតុការណ៍នោះបានកើតឡើង កាលពីវេលាម៉ោង៤ និង១៥នាទីរសៀល ថ្ងៃពុធ ១កើត ខែបឋមាសាឍ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៣ ខែមិថុនា ឆ្នាំ២០១៨ នៅក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិសែនជ័យ រាជធានីភ្នំពេញ ។
ភាគីដើរតួអង្គប្ដីឈ្មោះ វ៉ាត់ សុខន អាយុ៣៥ឆ្នាំ មុខរបរកម្មកររោងចក្រកាត់ដេរជាមួយគ្នា មានទីលំនៅក្នុងភូមិត្រពាំងធ្នង់ សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
ចំណែកភាគីដែលដើរតួអង្គប្រពន្ធមានឈ្មោះ ឈាង វី អាយុ២៥ឆ្នាំ មុខរបរកម្មការិនីរោងចក្រកាត់ដេរ មានស្រុកកំណើតនៅក្នុងភូមិស្តុក ឃុំស្វាយចចឹប ស្រុកបរសេដ្ឋ ខេត្តកំពង់ស្ពឺ ។
ប្រភពព័ត៌មានបានឲ្យដឹងថា គូស្នេហ៍ភេទដូចគ្នាខាងលើមានការស់នៅរួមសុខរួមទុក្ខជាមួយគ្នារយៈពេល៧ឆ្នាំមកហើយដោយមានអនុស្សាវរីយ៍គ្រប់រស់ជាតិមិនអាចបំភ្លេចបានហើយពួកគេបានសច្ចាយកគ្នាជាប្ដីប្រពន្ធ និងរស់នៅជាមួយគ្នាអស់មួយជីវិតពួកគេបានរស់នៅជាមួយគ្នាក្រោមដំបូលផ្ទះខាងតួអង្គប្រុស ។ ចំណែកឪពុកម្ដាយ និងក្រុមគ្រួសារខាងតួអង្គប្រុសមិនបានបំបែកបំបាក់កូនទេ ហើយបានចាត់ទុកថា ជាកម្មពៀរ និងនិស្ស័យគូព្រេងរបស់កូនដែលស្រឡាញ់ភេទដូចគ្នាបែបនេះ ។ ប៉ុន្តែចំពោះឪពុកម្ដាយក្រុម គ្រួសារខាងតួអង្គស្រីវិញ មិនដូច្នោះឡើយ ។ តែងតែស្ដីប្រដៅកុំឲ្យកូនធ្វើបែបនេះ ព្រោះវានាំឲ្យវង្សត្រកូល គ្រួសារ ទទួលរងភាពអាម៉ាស់ និងតែងអូសទាញយកកូនស្រីត្រឡប់ទៅផ្ទះវិញជាបន្តបន្ទាប់ ។ ប៉ុន្តែទោះជាខំប្រឹងយ៉ាងណាក៏កូនស្រីមិនតាមឡើយ ព្រោះនាងបានសម្រេចចិត្តរស់នៅជាប្ដីប្រពន្ធជាមួយ តួអង្គប្រុសរហូតចាស់កោងខ្នងរួចទៅហើយ ។
តែដោយទ្រាំភាពអាម៉ាស លែងបានទើបឪពុកម្ដាយខាងស្រីសម្រេចចិត្តលើកគ្នាទៅនាំកូនស្រីត្រឡប់ទៅផ្ទះវិញធ្វើយ៉ាងណាត្រូវតែនាំទៅឲ្យខានតែបាន ។ ពេលទៅដល់បានឪពុកម្ដាយបាននាំកូនស្រីរួមទាំងតួអង្គប្រុសទៅកាន់ប៉ុស្តិ៍នគរបាល ដើម្បីសម្របសម្រួលគ្នា សុំយកកូនស្រីត្រឡប់ទៅផ្ទះវិញ ប៉ុន្តែពេលនោះកូនស្រីបានប្រកែកដាច់ អហង្ការថា មិនទៅចោលប្ដីសំណព្វចិត្តឡើយ ។ ដោយគ្មានជម្រើសទើបឪពុកម្ដាយក្រុមគ្រួសារ សម្រេចចិត្តចាប់សែងកូនស្រីលើកដាក់បញ្ចូលទៅក្នុងរថយន្តដឹកចាកចេញទៅបាត់ ។ ខណៈនោះដែរតួអង្គប្រុសបានស្រែកឲ្យនគរបាលជួយឃាត់កុំឲ្យឪពុកម្ដាយខាងតួអង្គស្រីនាំយកកូនត្រឡប់វិញដែរ តែនគរបាលគ្មានសិទ្ធិហាមឃាត់ឡើយ ហើយទីបំផុតតួអង្គប្រុសបានត្រឹមអង្គុយយំ សោកាទាំងក្ដីអស់សង្ឃឹម ៕ សុខសែនជ័យ
