សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែងៈ សមត្ថកិច្ចបានរឹបអូសសង្ស័យគ្រឿងញៀនជាង១០០ដុំ ស្មើទម្ងន់ជាង១០០គីឡូក្រាម កាលពីរសៀលថ្ងៃអង្គារ ១៤កើត ខែបឋមាសាឍ ឆ្នាំច សំរិទ្ធស័ក ព.ស.២៥៦២ ត្រូវនឹងថ្ងៃទី២៦ ខែមិថុនា ឆ្នាំ២០១៨ ស្ថិតនៅចំណុចច្រកអន្តរជាតិត្រពាំងគ្រៀលព្រំដែនកម្ពុជា-ឡាវ ខណៈក្រុមឈ្មួញដឹកចេញពីប្រទេសឡាវចូលមកក្នុងប្រទេសកម្ពុជា តាមរយរថយន្តក្រុងដឹកអ្នកដំណើរ «សូរិយា» ។
មន្រ្តីច្រកទ្វារអន្តរជាតិត្រពាំងគ្រៀល ក្រុងស្ទឹងត្រែង ឲ្យប្រភពព័ត៌មានដឹងថា ថ្នាំញៀនចំនួន១២០ដុំ ជាប្រភេទម៉ាកទឹកកក គឺក្នុងមួយដុំ ទម្ងន់ប្រហែលជា១គីឡូក្រាម ត្រូវបានរកឃើញលើរថយន្តក្រុងដឹកអ្នកដំណើរ «សូរិយា» ម៉ាក ហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3C-2671 ខណៈកំពុងធ្វើដំណើរចេញពីច្រកទ្វារអន្តរជាតិ និងបន្តគោលដៅទៅរាជធានីភ្នំពេញ។
ប្រភពថា ការឃើញថ្នាំញៀនដ៏ច្រើននោះ ត្រូវបាននាំចេញពីប្រទេសឡាវ កាលពីវេលាម៉ោងជាង៣រសៀលថ្ងៃទី២៦ មិថុនា ។ សមត្ថកិច្ច បានឃាត់មនុស្សប្រុស៣នាក់ សង្ស័យពាក់ព័ន្ធក្នុងករណីនេះ គឺតៃកុងរថយន្ត, អ្នកបកប្រែភាសា និងជនសង្ស័យជាម្ចាស់ថ្នាំញៀន ៕
