សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គ្រាន់តែករណីគ្រោះថ្នាក់ចរាចរណ៍បន្តិចបន្តួចសោះរវាងរថយន្តនិងរថយន្ត បានធ្វើឲ្យមានការកក់ស្ទះចរាចរពេញផ្លូវ ព្រោះតែបុរសម្នាក់អាងខ្លួនឯងជាលោកឧត្តមសេនីយ៍យោធាមិនដឹងថានៅអង្គភាពណានោះទេសង្ស័យស្រវឹងស្រា បានបើករថយន្តមួយគ្រឿងប៉ះគ្នាជាមួយរថយន្តមួយគ្រឿងទៀត ដោយមិនព្រមដោះស្រាយគ្នា បែរជាឈរឈ្លោះគ្នាផ្អើលដល់ពលរដ្ឋនិងសមត្ថកិច្ចចុះទៅជួយអន្តរាគមន៍ភ្លាមៗ ។
ករណីគ្រោះថ្នាក់ចរាចរនេះ បានកើតឡើងកាលពីព្រឹកថ្ងៃសុក្រ ១កើត ខែទុតិយាសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៣ ខែកក្កដា ឆ្នាំ២០១៨ ស្ថិតនៅចំណុចផ្លូវមុន្នីរ៉ែត សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
តាមប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញបុរសម្នាក់វ័យ៦០ឆ្នាំ ដែលអាងខ្លួនជាឧត្តមសេនីយ៍នោះ ទំនងជាស្រវឹងបានបើករថយន្តមួយគ្រឿងម៉ាកហ៊ីលុច វីហ្គូល ពណ៍ខ្មៅ ពាក់ស្លាកលេខ ភ្នំពេញ 2T-0707 បានបុកគ្នាជាមួយរថយន្តតូយូតា កូរ៉ូឡា ពណ៍ទឹកប្រាក់ ពាក់ស្លាកលេខបរទេស 6BCF546 និងជ្រុលទៅប៉ះរថយន្តមួយគ្រឿងម៉ាកឡង់គ្រីស័រ ពណ៍ទឹកប្រាក់ ស្លាកលេខ ភ្នំពេញ 2AI-4774 ហើយមិនព្រមធ្វើការសម្របសម្រួលជាមួយរថយន្តរងគ្រោះនោះទេ បែរជាថាខ្លួនជាអ្នកត្រូវទៅវិញ ទើបបង្កការឈ្លោះប្រកែកគ្នាយកត្រូវរៀងៗខ្លួន និងបង្កការកក់ស្ទះចរាចរណ៍ពេញផ្លូវផ្អើលដល់សមត្ថកិច្ចមូលដ្ឋាននិងនគរបាលជំនាញចុះមកអន្តរាគមន៍ផងដែរ ។
ក្រោយកើតហេតុដោយសមត្ថកិច្ចជួយធ្វើការសម្របសម្រួល ហើយភាគីរថយន្តរងគ្រោះ២គ្រឿងមិនរងការខូចខាតខ្លាំង ក៏ព្រមយករថយន្តទៅជុសជួលរៀងៗខ្លួន ព្រោះមិនចង់មានរឿងវែងឆ្ងាយ ៕ ស តារា
