សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នគរបាលខណ្ឌច្បារអំពៅ តាមស្រាវជ្រាវឃាត់ខ្លួនចោរជនជាតិវៀតណាមម្នាក់ ក្នុងចំណោមបក្ខពួក២នាក់ កាលពីម៉ោង៧និង៣០នាទីព្រឹកថ្ងៃទី១៦ ខែកញ្ញា ឆ្នាំ២០១៨ ក្រោយពីពួកគេធ្វើសសម្មភាពគាស់សោទ្វារផ្ទះលួចម៉ូតូបានសម្រេច នៅផ្ទះ១៩៩ ភូមិតាងៅកណ្តាល សង្កាត់និរោធ ខណ្ឌច្បារអំពៅ កាលពីម៉ោង២រំលងអធ្រាត្រឈានចូលថ្ងៃទី១៦ ខែកញ្ញា ឆ្នាំ២០១៨ ។
មន្រ្តីនគរបាលខណ្ឌច្បារអំពៅ បានឲ្យដឹងថា ជនសង្ស័យដែលឃាត់ខ្លួន ឈ្មោះង្វៀង យ៉ាំងទឹង ភេទប្រុស អាយុ២៥ឆ្នាំ ជនជាតិវៀតណាម មុខរបរ មិនពិតប្រាកដ ស្នាក់នៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ ។ ចំណែកជនងគ្រោះឈ្មោះ ជា សំណាង ភេទ ប្រុស អាយុ៤២ឆ្នាំ ជនជាតិវៀតណាម មុខរបរ ជាងឈើ ស្នាក់នៅផ្ទះកើតហេតុ ។
តាមសម្តីជនរងគ្រោះ បានប្រាប់សមត្ថកិច្ចឲ្យដឹងថា កាលពីព្រឹកថ្ងៃទី១៥ ខែកញ្ញា ឆ្នាំ២០១៨ គាត់បានទុកម៉ូតូម៉ាក Yamaha Exciter ពណ៌ខៀវ គ្មានស្លាកលេខ នៅក្នុងផ្ទះកើតហេតុ រួចចេញទៅធ្វើការនៅម្តុំអូរឌឹម ខណ្ឌពោធិ៍សែនជ័យ រហូតដល់ម៉ោង២យប់ឈានចូលថ្ងៃទី ១៦ ខែឆ្នាំដដែល ស្រាប់តែមានជនសង្ស័យ២នាក់ ឈ្មោះង្វៀង យ៉ាំងទឹង និងឈ្មោះ តាំង គូ បានធ្វើសកម្មភាពយកដង្កាប់ និងដែកទួរណឺវ៉ីសទៅគាស់សោទ្វារផ្ទះចូល លួចយកម៉ូតូខាងលើបានសម្រេច រួចនាំគ្នាជិះគេចខ្លួនបាត់ស្រមោល ។ លុះដល់ម៉ោង៧និង៣០នាទី ថ្ងៃដដែល ជនសង្ស័យឈ្មោះ ង្វៀង យ៉ាំងទឹង និងឈ្មោះ តាំង គូ កំពុង ឈប់ម៉ូតូនៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ ក៏ត្រូវបានសមត្ថកិច្ច ឃាត់ខ្លួនបានជនសង្ស័យម្នាក់ឈ្មោះ ង្វៀង យ៉ាំងទឹង ដកហូតម៉ូតូ១គ្រឿង និងឧបករណ៍ធ្វើសកម្មភាពមួយចំនួន បញ្ជូនមកអធិការដ្ឋាននគរបាលខណ្ឌច្បារអំពៅ ចាត់ការតាមច្បាប់តែម្តង ។
ចំណែកជនសង្ស័យឈ្មោះ តាំង គូ បានរត់គេចខ្លួនបាត់ ហើយជនសង្ស័យជាមនុស្សប្រើប្រាស់គ្រឿងញៀនផងដែរ ៕ ស តារា
