ចិនម្នាក់បើកឡានបុកទ្រូងផ្លូវហើយក្រឡាប់ផ្ងារសន្លប់ឈឹង បញ្ជូនទៅសង្គ្រោះបន្ទាន់

ភ្នំពេញ៖ បុរសជនជាតិចិនម្នាក់ បើករថយន្តស៊េរីទំនើបមួយគ្រឿង ម៉ាក BMW ក្នុងល្បឿនលឿនបានជ្រុលចង្កូតទៅបុកក្បាលនាគពុះចែកទ្រូវផ្លូវ បណ្តាលឲ្យបាក់អស់១កង់ រថយន្តបង្កក្រឡាប់ផ្ងារជើងទ្រមេឃ ចំណែកម្ចាស់រថយន្តបង្ករបួសធ្ងន់បញ្ជូនទៅសង្គ្រោះបន្ទាន់ ។

ហេយុការណ៍នេះ កើតឡើងកាលពីវេលាម៉ោងរំលងអធ្រាត្រ ឈានចូលថ្ងៃទី២២ ខែកញ្ញា ឆ្នាំ២០១៨ ស្ថិតនៅចំណុចមុខអាកាសយាន្តដ្ឋានអន្តរជាតិភ្នំពេញ តាមបណ្តោយមហាវិថីសហព័ន្ធរុស្សុី​ ក្នុងសង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុ គេឃើញបុរសជនជាតិចិនម្នាក់ បើករថយន្តស៊េរីទំនើបមួយគ្រឿង ម៉ាកBMW ពណ៌ស ពាក់ស្លាកលេខ ភ្នំពេញ 2S-0883 ទិសដៅពីលិចទៅកើត ក្នុងល្បឿនយ៉ាងលឿន លុះមកដល់ចំណុចកើតហេតុខាងលើ បានរេចង្កូតមកខាងឆ្វេងដៃ ជ្រុលទៅបុកក្បាលនាគ ពុះចែកទ្រូងផ្លូវ ពេញទំហឹងបណ្តាលឲ្យរងរបួសធ្ងន់ ត្រូវបានរថយន្តសង្ក្រោះបន្ទាន់ដឹកយកទៅសង្គ្រោះភ្លាមៗ ចំណែកក្បាលនាគពុះចែកទ្រូវផ្លូវបាក់អស់១កង់ រីឯរថយន្តបង្ក ក្រឡាប់ផ្ងារជើងទ្រមេឃខូចខាតស្ទើរតែទាំងស្រុង ។

ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ និងបានទំនាក់ទំនងទៅសមត្ថកិច្ចជំនាញ ចុះមកវាស់វែងយករថយន្តបង្កទៅរក្សាទុកនៅការិយាល័ចរាចរណ៍ផ្លូវគោករាជធានីភ្នំពេញ រង់ចាំដោះស្រាយគ្នាទៅតាមផ្លូវច្បាប់ ៕ សុខាសែនជ័យ