សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ស្រវឹងជោកជាំបានបើករថយន្តស៊េរីទំនើប ក្នុងល្បឿនលឿនរេចង្កូតទៅបុករះរទេះលក់ដូរនៅចិញ្ចើមផ្លូវបណ្តាលឲ្យរងការខូចខាត ហើយរថយន្តនៅមិនទាន់អស់ល្បឿន ក៏បន្តទៅមុនចូលទៅក្នុងការដ្ឋានមួយកន្លែងទៀត ទើបទៅមុនលែងរួច។
ហេតុការណ៍នេះ បានកើតឡើងកាលពីវេលាម៉ោងរំលងអាធ្រាត ឈានចូលថ្ងៃទី១៨ ខែតុលាឆ្នាំ២០១៨ នៅចំណុចមុខស្ថានទូត អូស្ត្រាលី ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរទេះលក់ដូរមានដបសាំងដែលដាក់លក់នៅតាមចិញ្ចើមផ្លូវត្រង់ចំណុចកើតហេតុជារៀងរាល់ថ្ងៃ លុះមកដល់ចំណុចកើតហេតុស្រាប់តែមានបុរសម្នាក់បើករថយន្តម៉ាក OD ពណ៌ពាក់ស្លាកលេខ ភ្នំពេញ 2 AO 8808 ស្រវឹងជោកជាំធ្វើដំណើរតាមបណ្តោយផ្លូវវិថីរដ្ឋសភាក្នុងទិសដៅពីជើងទៅត្បូង ល្បឿនលឿន ខណៈមកដល់ចំណុចកើតហេតុ ក៏រេចង្កូតទៅបុករះរទេះលក់ដូរមានទាំងដបសាំងបណ្តាលឲ្យរងការខូចខាត តែមិនមានអ្នករបួសធ្ងន់ឡើយ ហើយរថយន្តបង្កនៅមិនទាន់អស់ល្បឿន ក៏បន្តទៅបុកការដ្ឋានមួយកន្លែងទៀត បណ្តាលឲ្យរងការខូចខាតទៅមុខលែងរួចតែម្តង ។
ក្រោយពេលកើតហេតុ ប្រជាពលរដ្ឋបានចាប់ម្ចាស់រថយន្តបានភ្លាមៗ ហើយរាយការណ៍ទៅសមត្ថកិច្ច ចុះមកដល់ចំណុចកើតហេតុ និងទំនាក់ទំនងទៅជំនាញមកយករថយន្តរួមទាំងម្ចាស់ទៅការិយាល័យចរាចរណ៍ជើងគោក រាជធានីភ្នំពេញរង់ចាំដោះស្រាយតាមច្បាប់ ៕ សុខាសែនជ័យ
