សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖លទ្ធផល និងផែនការអនុវត្ត កម្មវិធីវិនិយោគបីឆ្នាំរំកិល សង្កាត់ខណ្ឌឆ្នាំ២០១៩-២០២១ផ្សព្វផ្សាយគំរោងសកម្មភាពសង្កាត់ខណ្ឌសម្រាប់អនុវត្តបន្តសាលាខណ្ឌព្រែកព្នៅ នាព្រឹកថ្ងៃទី៣០ខែតុលា ឆ្នាំ២០១៨នេះបានរៀបចំសិក្ខាសិលា សមាហរណកម្ម កម្មវិធីវិនិយោគសង្កាត់នៅថ្នាក់ខណ្ឌនិងកម្មវិធីវិនិយគ បីឆ្នាំរំកិលខណ្ឌ២០១៩-២០២១ ដើម្បីផ្សព្វផ្សាយពី គំរោងសកម្មភាពសម្រាប់សង្កាត់ខណ្ឌអនុវត្តបន្តនៅឆ្នាំបន្តបន្ទាប់ខាងមុខនេះ។
ពិធីនេះធ្វើឡើងក្រោមវត្តមាន ឯកឧត្ត ស៊ុយ សេរិទ្ធ អភិបាលរងរាជធានីភ្នំពេញ ដោយមានការចូលរួមដោយលោក សុខ សម្បត្តិ អភិបាលខណ្ឌព្រែកព្នៅនិងលោក ម៉ៅ បូរ៉ា ប្រធានក្រុមប្រឹក្សាខណ្ឌ និង មន្រ្តីផែនការរាជធានីភ្នំពេញ ប្រធាននិងអនុប្រធានមន្ទីរ អង្គការនិងសប្បុរសជន ចៅសង្កាត់និងមន្ត្រីសាលាខណ្ឌជាច្រើនរូបទៀត។
លោក សុខ សម្បត្តិ បានថ្លែងឲ្យដឹងថា សិក្ខាសិលាសមាហរណកម្ម កម្មវិធីវិនិយោគសង្កាត់ នៅថ្នាក់ខណ្ឌនិងកម្មវិធីវិនិយោគបីឆ្នាំ រំកិល ខណ្ឌ២០១៩-២០២១ នាពេលនេះ ជាការរួមចំណែកដ៏សំខាន់ ដើម្បីគាំទ្រនូវ គម្រោងសកម្មភាព ដែលជាតម្រូវការចាំបាច់ របស់ប្រជាពលរដ្ឋ ក្នុងមូលដ្ឋាន។
លោកអភិបាលបានបន្តថា ការរៀបចំសិក្ខាសិលាសមាហរណកម្មផែនការសង្កាត់ និងកម្មវិធីវិនិយោគ ដើម្បីផ្សព្វផ្សាយពីគំរោងសកម្មភាព ក្នុងកម្មវិធីវិនយោគសង្កាត់ ខណ្ឌ២០១៨ សម្រាប់អនុវត្តក្នុងឆ្នាំ២០១៩និងស្នើរសុំការគាំទ្រពីមន្ទីជំនាញ អង្គការ ដៃគូអភិវឌ្ឍន៍នានា ផ្នែកឯកជន និងសប្បុរសជន ដែលចាប់អារម្មណ៍លើគម្រោងស្នើឡើងរបស់ សង្កាត់ និងខណ្ឌ ទោះបីតិចក្តីច្រើនក្តី។
លោកបានបន្តទៀតថា លទ្ធផលនៃការអនុវត្តគម្រោង កម្មវិធីវិនិយោគបីឆ្នាំ រំកិលខណ្ឌ ដែលបានគាំទ្រ ក្នុងសិក្ខាសាលាសមាហរណកម្មឆ្នាំ២០១៨ ទទួលបានការគាំទ្រចំនួន៩០គម្រោង សម្រេចបាន១០២% ក្នុងនោះមាន ផ្នែកសេដ្ឋកិច្ចមានចំនួន២១គម្រោងស្មើ១០៥%ផ្នែកសង្គមកិច្ចចំនួន៤៥គម្រោងស្មើ១០៥%ផ្នែកធនធានធម្មជាតិ បរិស្ថានចំនួន០៩គម្រោងស្មើ៩០% ផ្នែកសរដ្ឋបាល និងសន្តិសុខចំនួន១៥គម្រោងស្មើ១០០%។
លោកក៏បានបព្ជាក់ផងដែរថា សម្រាប់គម្រោងកម្មវិធីវិនិយោគបីឆ្នាំ រំកិលខណ្ឌ២០១៩-២០២១ មានចំនួន២៤៦គម្រោង ស្មើនឹង១១០% ដែលកនុងនោះរួមមាន៖ ផ្នែកកសិកម្ម ចំនួន២៣គម្រោង ផ្នែកអាជីវកម្ម មានចំនួន៧គម្រោង ផ្នែកអប់រំ មានចំនួន១៥គម្រោង ផ្នែក សុខភាព មាន៥៥គម្រោង ផ្នែកភាពងាយរងគ្រោះ ៥គម្រោង បរិស្ថាន ៣១គម្រោង និងរដ្ឋបាល សន្តិសុខ មាន ១១០ គម្រោង អាទិភាពប្រចាំឆ្នាំ២០១៩។
លោក ស៊ុយ សេរិទ្ធ អភិបាលរងរាជធានីភ្នំពេញ បានស្នើស្ថាប័ន និងអ្នកពាក់ព័ន្ធ ក្នុងមូលដ្ឋាន បន្តយកចិត្តទុកដាក់ និងគាំទ្របន្ថែមទៀត ដើម្បីឲ្យមូលដ្ឋានមានការអភិវឌ្ឍស្របតាមយុទ្ធសាស្រ្ត និងគោលនយោបាយរបស់រាជរដ្ឋាភិបាល ពិសេសបំពេញឲ្យបានល្អនូវតម្រូវការចាំបាច់របស់ប្រជាពលរដ្ឋក្នុងមូលដ្ឋាន។
លោក អភិបាលរង បញ្ជាក់ថា ខណ្ឌ សង្កាត់ រៀបចំគម្រោងផែនការអភិវឌ្ឍន៍ទទួលបានជោគជ័យ ក៏ដោយសារតែមានការ ចូលរួមនិងគាំទ្រពីប្រជាពលរដ្ឋក្នុងមូលដ្ឋាន មន្ទីរជំនាញ អង្គការ ផ្នែកឯកជន និងដៃគូរអភិវឌ្ឍន៍នានា។
ជាមួយគ្នានោះ លោក ក៏បានផ្តល់នូវអនុសាសន៍មួយចំនួន សម្រាប់អនុវត្តបន្ត ក្នុងគម្រោងផែនការខាងមុខ ដូចជា ស្នើឲ្យពិនិត្យលទ្ធភាព ទៅលើគម្រោងណា ដែលគួរគាំទ្រដល់ថ្នាក់ ខណ្ឌ និងសង្កាត់ ក្រៅពីនេះក៏ស្នើ ដល់គ្រប់វិស័យ ដែលបានសន្យា បន្តគាំទ្រគម្រោងនានា ដោយបញ្ចូលទៅក្នុងផែនការប្រ ចាំឆ្នាំ២០១៩ របស់ខ្លួន ហើយខិតខំអនុវត្តឲ្យបានទាន់ពេលវេលា និងមានប្រសិទ្ធភាព ទៅតាមផែនការគ្រោងទុក។ មួយវិញទៀត ស្នើឲ្យសង្កាត់ ខណ្ឌ ត្រួតពិនិត្យឲ្យបានល្អិតល្អន់រាល់គម្រោងដែលបានសន្យា បើធ្វើមិនបាន ត្រូវសួរនាំ ដើម្បីឲ្យដឹងពីមូលហេតុច្បាស់លាស់ និងរាយការមកថ្នាក់លើជាបន្តបន្ទាប់ ដើម្បីប្រមូលព័ត៌មាន សម្រាប់បញ្ជូន នឹងផ្តល់ព័ត៌មាន ទៅអភិបាលរាជធានីភ្នំពេញបានជ្រាបបន្ត ៕ ចាន់ធឿន
