បុរសម្នាក់មានជម្លោះជាមួយប្រពន្ធ រត់ទៅធ្វើអត្តឃាតលើដើមត្នោតស្លាប់

ខេត្តស្វាយរៀង៖ មានការភ្ញាក់ផ្អើលដល់ក្មេងឃ្វាលក្របី រត់ស្រែកហៅអ្នកភូមិ និងក្រុមគ្រួសារជួយសង្គ្រោះជីវិតបុរសម្នាក់ ខណៈប្រទះឃើញចងកសម្លាប់ខ្លួនក្រោមដើមត្នោត និងប្រញាប់ប្រញាលដោះមកដាក់ដល់ដី ប៉ុន្តែអកុសលហួសពេលទៅហើយ ។

ហេតុការណ៍នេះបានកើតឡើងកាលពី ថ្ងៃទី៣០ ខែវិច្ឆិកា ឆ្នាំ២០១៨ វេលា ម៉ោង៤ និង45នាទីរសៀល ស្ថិតនៅក្នុងភូមិពោធិរស់ ឃុំបាសាក់ស្រុកស្វាយជ្រំ ខេត្តស្វាយរៀង ។

បើតាមសមត្ថកិច្ចនគរបាលស្រុកស្វាយជ្រំបានឲ្យដឹងថាបុរសដែលសង្ស័យគិតខ្លីចងកសម្លាប់ខ្លួនមានឈ្មោះប៉ែន ចន្នី អាយុ៣៦ឆ្នាំ មុខរបរកសិករ រស់នៅភូមិ ឃំុកើតខាងលើ ។

បន្ទាប់ពីទទួលសេចក្ដីរាយការណ៍ អាជ្ញាធរភូមិភ្លាម សមត្ថកិច្ចនគរបាលស្រុកនគរបាលប៉ុស្តិ៍រដ្ឋបាល និងគ្រូពេទ្យបានចុះមកដល់ចំណុចកើតហេតុ និងបានពិនិត្យជាច្រើនម៉ោង ឃើញថា បុរសគិតខ្លីពិតជាបានចងកសម្លាប់ខ្លួនប្រាកដមែន ដោយបានយកខ្សែគោចងនឹងដើមត្នោត ក្នុងភូមិចាស់ ដោយមិនមានស្លាកស្នាមអ្វីដែលសម្គាល់ថាជារឿងឃាដកម្មអ្វីនោះទេ ។

តាមអ្នកភូមិបានឲ្យដឹងថាបុរសខាងលើគឺធ្លាប់មានវិបតិ្តនៅក្នុងក្រុមគ្រួសារដោយសារតែប្រពន្ធប្រច័ណ្ឌពេកមានជម្លោះពាក្យសំដីស្ទើរាល់ថ្ងៃណាមួយបុរសនេះធ្លាប់លេបថ្នាំសម្លាប់ខ្លួន និងរត់ទៅចងកម្តង២ដងរួចហើយ ប៉ុន្តែត្រូវសង្គ្រោះទាន់ លុះមកដល់លើកនេះមិនអាចសង្គ្រោះទាន់នោះទេ ។

បច្ចុប្បន្នសាកសពសមត្ថកិច្ចបានប្រគល់ប្រគល់ឲ្យទៅក្រុមគ្រួសារយកទៅធ្វើបុណ្យតាមប្រពៃណី ៕ យឹម សុថាន