សារព័ត៌មាន នគរវត្ត តែងតែនាំមុខគេជានិច្ច
បើទោះបីជាថ្នាក់ដឹកនាំអគ្គនាយកដ្ឋានរដ្ឋបាលព្រៃឈើបានបញ្ចេញប្រតិកម្មករណីលោក សួស សុផានិត នាយផ្នែករដ្ឋបាលព្រៃឈើក្រវាញល្បីល្បាញខាងប្រមូលលុយពីរថយន្ត និងគោយន្តកែច្នៃដឹកឈើយ៉ាងណាក៏ដោយ ក៏ពួកអ្នករកស៊ីដឹកឈើអះអាងថា ពួកគេនៅតែបន្តរកស៊ីជាធម្មតា ហើយការបង់ប្រាក់ឲ្យលោក សួស សុផានិត ក៏នៅតែបន្តជាធម្មតាដែរ ។ លោកសួស សុផានិត បានប្រាប់ពួកអ្នករកស៊ីដឹកឈើតាមគោយន្ត និងតាមរថយន្តនៅតាមផ្លូវជាតិលេខ៥៥ ក្នុងស្រុកភ្នំក្រវាញនោះថា បើមិនយកលុយពីពួកអ្នករកស៊ីបទល្មើស តើខ្លួន(សួស សុផានិត) បានលុយឯណាជូនថ្នាក់លើ? ថ្នាក់លើដែលលោក សួស សុផានិត សំដៅនោះ គឺអគ្គនាយកដ្ឋានរដ្ឋបាលព្រៃឈើ ដែលបានឲ្យខ្លួនធ្វើរបាយការណ៍អំពីបញ្ហាបទល្មើសនៅស្រុកភ្នំក្រវាញកាលពីខែមុននោះថា វាគ្រាន់តែជាវិធី ដែលថ្នាក់លើចង់បានការចែករំលែកខ្លះពីលោកតែប៉ុណ្ណោះ ។
សេចក្តីរាយការណ៍ពីក្រុមអ្នករកស៊ីដឹកឈើបានឲ្យដឹងថា សកម្មភាពនៃការដឹកជញ្ជូនឈើតាមគោយន្តកែច្នៃ នៅតែមានសកម្មភាពជាហូរហែមិនដាច់ដូចមុនដដែល ហើយតម្លៃ នៃការបង់ប្រាក់ជូនមន្ត្រីជំនាញរដ្ឋបាលព្រៃឈើក៏មិនបានថយចុះនោះដែរ ។ រថយន្តដែលដឹកឈើប្រឡៅមូល ត្រូវបង់ឲ្យលោក សួស សុផានិត ១០ម៉ឺនរៀល ចំណែកឈើអារ ត្រូវបង់ជូន១៥ម៉ឺនរៀល ។ ក្នុងមួយថ្ងៃៗ មានគោយន្ត និងរថយន្តដឹកឈើឆ្លងកាត់ផ្លូវជាតិលេខ៥៥ ក្នុងស្រុកភ្នំក្រវាញរាប់រយគ្រឿង ដែលជាប្រភពចំណូលរាប់សិបលានរៀលរបស់លោក សួស សុផានិត ។ បើតាមសេចក្តីរាយការណ៍បានបន្ថែមថា រថយន្តដឹកឈើឆ្លងកាត់ផ្លូវជាតិលេខ៥៥ត្រូវតែសុំការអនុញ្ញាតពីលោក សួស សុផានិត ជាដាច់ខាត ។ ពួកគេទាក់ទងគ្នាតាមទូរស័ព្ទក្នុងការដឹកជញ្ជូនឈើ រីឯប្រាក់កាសគឺទូទាត់តាមរយៈការវេរលុយ ។ អ្នកដែលអាចដឹកជញ្ជូនឈើរត់គេចបានម្តង ត្រូវប្រឈមនឹងពិន័យលើកក្រោយធ្ងន់ក ។
ប្រភពព័ត៌មានបានឲ្យដឹងថា លោកសួស សុផានិត អាចធ្វើអ្វីៗទៅបាន ដោយមានការឃុបឃិតពីសំណាក់នាយខណ្ឌរដ្ឋបាលព្រៃឈើ ជាពិសេសលោកឡាយ វិសិដ្ឋ នាយខណ្ឌរដ្ឋបាលព្រៃឈើនោះតែម្តង ។ រីឯអគ្គនាយកដ្ឋានរដ្ឋបាលព្រៃឈើ ទំនងជាបានលាភសក្ការពីលោកសួស សុផានិត ដែរ ទើបបានជាបណ្តោយឲ្យលោក សួស សុផានិត ធ្វើព្យុះធ្វើភ្លៀងបានតាមអំពើចិត្ត នៅក្នុងមូលដ្ឋានស្រុកភ្នំក្រវាញនេះ ។ ប្រសិនបើថ្នាក់ដឹកនាំអគ្គនាយកដ្ឋានរដ្ឋបាលព្រៃឈើ ជាពិសេសក្រសួងកសិកម្មផ្ទាល់ ប្រសិនបើគ្មានចំណែកហ៊ុនហយ ពុករលួយជាមួយបុគ្គល សួស សុផានិត ទេនោះ ម្ល៉េះចាត់ការឲ្យលោក សួស សុផានិតបន្ថយសកម្មភាព ប្រព្រឹត្តល្មើសនោះខ្លះៗហើយ ។ គេជឿថា អ្វីដែលលោក សួស សុផានិត បានធ្វើគឺជាប្រព័ន្ធទើបអាចដំណើរការបានដល់សព្វថ្ងៃនេះ ៕
