សារព័ត៌មាន នគរវត្ត តែងតែនាំមុខគេជានិច្ច
ខេត្តកោះកុង ៖ មានហេតុការណ៍ គ្រោះថ្នាក់ចរាចរណ៍គួរឲ្យរន្ធត់មួយកើតឡើង រវាងរថយន្តដឹកទំនិញ បុកជាមួយម៉ូតូ បណ្ដាលឲ្យពីរនាក់ប្ដីប្រពន្ធរងរបួសធ្ងន់កាលពីរសៀល ថ្ងៃអង្គារ ១០ កើត ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១៥ ខែធ្នូ ឆ្នាំ ២០១៩ ស្ថិតនៅលើផ្លូវជាតិលេខ៤៨ ត្រង់ចំណុចផ្លូវចូលសពយុវជនវត្តថ្មី ភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ។
ប្រភពព័ត៌មានពីកន្លែងកើតហេតុបានឲ្យដឹងថា ម៉ូតូម៉ាកហុងដាសេ១២៥ ពណ៌ខ្មៅ ស្លាកលេខ មណ្ឌលគិរី ១B ៤៩ ៦៨ ជិះគ្នា២នាក់ប្ដី ប្រពន្ធ បើកចេញពីខាងត្បូងផ្លូវទៅជើង បម្រុងឆ្លងផ្លូវជិតគំនូសទ្រូងផ្លូវបានបន្តិច ស្រាប់តែមានរថយន្ត១គ្រឿងធុនធំ ដឹកទំនិញ ពណ៌ប្រផែះ ពាក់ស្លាកលេខ PP ២៨,៣២ ចង្កូតស្ដាំ បើកពីកើតទៅលិច បានកៀរម៉ូតូខាងលើបណ្តាលឲ្យម៉ូតូខ្ទាតទៅមុខ ធ្វើឲ្យអ្នកជិះម៉ូតូទាំងពីរនាក់ដួលរងរបួសធ្ងន់ ។
ប្រភពដដែលបានឲ្យដឹងទៀតថា ជនរងគ្រោះ ឈ្មោះ ហ៊ាំ ឡោះ ភេទប្រុស អាយុ ៥៥ ឆ្នាំ រងរបួសបាក់ជើងឆ្វេង (អ្នកបើកបរម៉ូតូ) និងឈ្មោះ គន្ធា រ៉ា ភេទស្រី អាយុ ៤៧ ឆ្នាំជាប្រពន្ធ រងរបួសដៃ និងបែកក្បាលក្អួតរហូត ។ រីឯអ្នកបើកបររថយន្តបង្ក បានទុករថយន្តចោល ចុះរត់គេចខ្លួនបាត់ស្រមោល ។ បន្ទាប់មក រថយន្ត និងម៉ូតូ ត្រូវសមត្ថកិច្ចនគរបាលចរាចរ យកមករក្សាទុកនៅស្នងការដ្ឋាននគរបាលខេត្តកោះកុងរង់ចាំដោះស្រាយជាមួយជនរងគ្រោះពេលក្រោយ ៕ សហការី
