សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យចំនួន២នាក់ ជាមុខសញ្ញាដើរលួចកាច់.កម៉ូតូប្រជាពលរដ្ឋតាមផ្ទះ ត្រូវបានកម្លាំងនគរបាលប៉ុស្តិ៍ស្ទឹងមានជ័យទី១ ខណ្ឌមានជ័យ ឃាត់ខ្លួន បន្ទាប់ពីប្រទះឃើញជនសង្ស័យ២នាក់នេះ ជិះម៉ូតូវីវ៉ាមួយគ្រឿងដើរធ្វើសកម្មភាពប្រុងកាច់.កម៉ូតូពលរដ្ឋ ដោយមានការសង្ស័យក៏បានឃាត់ខ្លួននិងឆែកឆេរ រកឃើញកាបូបស្ពាយរបស់ជនសង្ស័យមានសោសំរាប់កាច់.កម៉ូតូ មួយកំផ្លេរនិងសោសម្រាប់ដោះគ្រឿងម៉ូតូមួយចំនួនទៀត ។
លោកម៉ៅ សាវឿន នាយប៉ុស្តិ៍នគរបាលស្ទឹងមានជ័យទី១ បានឲ្យដឹងថា ជនសង្ស័យទាំង២នាក់ទី១;ឈ្មោះចានរ៉ាវុធអាយុ៣៥ឆ្នាំមុខរបររើសអេតចាយ និងជនសង្ស័យទី២ឈ្មោះផុនអយអាយុ១៧ឆ្នាំ ហើយនៅវេលាម៉ោង១២រំលងអាធ្រាត្រឈានចូលថ្ងៃអាទិត្យ ៥រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៤ ខែកុម្ភះ ឆ្នាំ២០១៩ កម្លាំងនគរបាលរដ្ឋបាលប៉ុស្តិ៍ស្ទឹងមានជ័យទី១ បានធ្វើការល្បាតពួនស្ទាក់ក្នុងមូលដ្ឋាន ដើម្បីការពារនិងរក្សាសុខសុវត្ថិភាពជូនប្រជាពលរដ្ឋនៅចំណុចផ្លូវបេតុង ភូមិមានជ័យ១ សង្កាត់ស្ទឹងមានជ័យ១ ក៏បានប្រទះឃើញជនសង្ស័យ២នាក់ជិះម៉ូតូម៉ាក ស៊ុយហ្ស៊ីយគីវីវ៉ា មួយគ្រឿង ដោយមានការសង្ស័យសមត្ថកិច្ចក៏បានឃាត់ឲ្យឈប់ ដើម្បីធ្វើការឆែកឆេរជាក់ស្តែង ស្រាប់តែរកឃើញកាបូបស្ពាយរបស់ជនសង្ស័យទាំង២នាក់នោះ មានសោសម្រាប់កាច់.កម៉ូតូ មួយកំផ្លេរនិងសោសម្រាប់ដោះគ្រឿងម៉ូតូមួយចំនួនទៀត រួចនាំជនសង្ស័យទៅធ្វើការសាកសួបន្តនៅប៉ុស្តិ៍នគរបាលស្ទឹងមានជ័យទី១ តាមនីតិវិធី ។
នៅចំពោះមុខសមត្ថកិច្ចជនសង្ស័យទាំង២នាក់បានសារភាពថាពួកគេគឺជិះម៉ូតូបំរុងដើរលួចម៉ូតូឬក៏សម្ភារៈណាដែលមានតម្លៃរបស់ប្រជាពលរដ្ឋដែលទុកដាក់ធ្វេសប្រហែស គឺពួកគេនិងលួចយក តែចៃដន្យក៏ប្រទះជាមួយនិងសមត្ថកិច្ចចាប់ឃាត់ខ្លួនតែម្តង ។
បច្ចុប្បន្នជនសង្ស័យទាំង២នាក់ខាងលើ ត្រូវបានបញ្ជូនទៅកាន់អធិការដ្ឋាននគរបាលខណ្ឌមានជ័យ ដើម្បីឃាត់ខ្លួនបណ្តោះអាសន្ន និងកសាងសុំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់ ៕ស រស្មី
