សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ជាអ្នករត់ម៉ូតូឌុប បានបែកគំនិតលួចខ្សែដៃ អ្នករត់ម៉ូតូរ៉ឺម៉កម្នាក់កំពុងដេកលង់លក់ តែមិនបានសម្រេច ត្រូវប្រជាពលរដ្ឋឃើញស្រែកឆោឡោ ផ្អើលសមត្ថកិច្ចមូលដ្ឋានកំពុងជិះល្បាតជួយធ្វើអន្តរាគមន៍ឃាត់ខ្លួនតែម្តង ។
ករណីខាងលើនេះ បានកើតឡើងកាលពីព្រឹកថ្ងៃអង្គារ ៧កើត ខែផល្គុន ឆ្នាំច សំរឹទ្ធស័ក ព.ស២៥៦២ ត្រូវនឹងថ្ងៃទី១២ ខែមីនា ឆ្នាំ២០១៩ នៅចំណុចមុខស្ថានីយប្រេងឥន្ទនៈយីហោ លី ហៀង ផ្លូវលេខ១៩២៧ ក្រុមទី៦ ភូមិគង្គាផុស សង្កាត់ទួលសង្កែទី២ ខណ្ឌឫស្សីកែវ ។
ជនសង្ស័យមានឈ្មោះ វ៉ាន់ សារុំ ភេទប្រុស អាយុ៤០ឆ្នាំ មុខរបរ រត់ម៉ូតូឌុប ស្នាក់នៅផ្ទះជួល សង្កាត់ បឹងទំពុន ទី២ ខណ្ឌមានជ័យ ។ ចំណែកជនរងគ្រោះឈ្មោះ ងួន មករា ភេទប្រុស អាយុ៣២ឆ្នាំ មុខរបររត់ម៉ូតូកង់បី ស្នាក់នៅផ្ទះជួលផ្លូវលេខ១០៣ ភូមិបាក់ទូក សង្កាត់ទួលសង្កែទី២ ខណ្ឌឫស្សីកែវ ។
តាមប្រភពពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ ជនរងគ្រោះកំពុងដេកនៅលើម៉ូតូរ៉ឺម៉ករបស់ខ្លួន ដែលចតនៅមុខស្ថានីយប្រេងឥន្ទនៈ ពេលនោះជនសង្ស័យឃើញឱកាសល្អ ក៏ចូលទៅដោះខ្សែដៃជនរងគ្រោះ ភ្លាមនោះត្រូវប្រជាពលរដ្ឋឃើញក៏ស្រែកឆោឡោ គាប់ជួនកម្លាំងសមត្ថកិច្ចមូលដ្ឋានកំពុងល្បាត ឃើញជួយធ្វើអន្តរាគមន៍ឃាត់ខ្លួនជនសង្ស័យបានជាក់ស្តែងតែម្តង ។
ក្រោយកើតហេតុ វត្ថុតាងដកហូតជាក់ស្តែងបាន៖ ខ្សែរដៃ១ ខ្សែលោហធាតុ ពណ៌លឿងទំងន់៩ជី ; ម៉ូតូមួយ គ្រឿងម៉ាក ហុងដាឌ្រីមសេ១២៥ ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ 1HI-3721 ។
បច្ចុប្បន្នជនសង្ស័យ ត្រូវបានបញ្ជូនទៅផ្នែកជំនាញ នៃអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿង ចាត់ការតាមនីតិវិធី ៕ អារុណរៈ
