សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ លោកកេត ម៉ៅ អភិបាលស្រុកសំរោង ខេត្តតាកែវបានរុញប្រជាពលរដ្ឋឲ្យមកជួយលាងសម្អាតគូថរបស់ខ្លួន ដែលស្អុយរលួយរឿងអភិបាលរងស្រុកចុះហត្ថលេខាឲ្យគេជីកយកអាចម៍ដីទៅលក់ដោយឲ្យប្រជាពលរដ្ឋទាំងនោះអះអាងថា លោកអភិបាលស្រុកមិនបានលក់បឹងអូរតាសុខនោះទេ ។ សម្រាប់អ្នកដែលឃើញហេតុការណ៍ពិតជាក់ស្តែងនៅឃុំសំរោង ស្រុកសំរោងខេត្តតាកែវ អះអាងថា បើលោកអភិបាលស្រុកមិនលក់ចំណែកដីបឹងអូរតាសុខទេនោះ ហេតុអ្វីបានជាត្រូវដកគ្រឿងចក្រទាំងយប់អធ្រាត្រកាលពីប៉ុន្មានថ្ងៃមុននោះ? ។
ក្រោមការរិះគន់ពីប្រជាពលរដ្ឋក្នុងស្រុក លោកកេត ម៉ៅ ថ្មីៗនេះ បានបើកយុទ្ធនាការលាងជម្រះខ្លួនដោយបានចុះណែនាំតាមសាលារៀននានាអំពីបញ្ហាល្បែងស៊ីសង និងគ្រឿងញៀនជាដើម ។ ប៉ុន្តែប្រជាពលរដ្ឋអះអាងថា ល្បែងស៊ីសងគ្រប់ប្រភេទពិសេសកន្ទុយលេខ ក៏ដូចជាគ្រឿងញៀនកំពុងរីករាលដាលយ៉ាងខ្លាំងនៅក្នុងភូមិសាស្ត្រស្រុកសំរោង ខេត្តតាកែវ ។ អាជ្ញាធរស្រុក អសមត្ថភាពស្ទើរតែទាំងស្រុងក្នុងវិធានការបង្ក្រាបល្បែងស៊ីសង និងគ្រឿងញៀន ។ មិនតែប៉ុណ្ណោះប្រជាពលរដ្ឋខ្សឹបខ្សៀវគ្នាថា អាជ្ញាធរស្រុកជាប់ពាក់ព័ន្ធបញ្ហាផលប្រយោជន៍ជាមួយនឹងល្បែងស៊ីសងច្រើនប្រភេទ រួមទាំងកន្ទុយលេខ ។ រីឯបញ្ហាគ្រឿងញៀន ក៏ប្រហាក់ប្រហែលនឹងបញ្ហាល្បែងស៊ីសងនេះដែរ ។
រីឯការលក់អាចម៍ដីបឹងអូរតាសុខ គឺជារឿងដែលលោកកេត ម៉ៅ មិនអាចប្រកែកបានឡើយ ។ ប្រសិនបើគ្រឿងចក្រនោះកាយបឹងដើម្បីឲ្យមានជម្រៅជ្រៅសម្រាប់ស្តុកទឹកទុកនោះ គ្រឿងចក្រមិនគួរដកចេញទាំងយប់អធ្រាត្រនោះឡើយ ។ ជាការពិតគឺអាចម៍ដីដែលបានពីការជីកបឹងអូរតាសុខនោះ លក់បានលុយរាប់ម៉ឺនដុល្លារឯណោះ ។ នេះគេហៅថា នយោបាយព្រួញមួយបាញ់បានសត្វពីរ ពោលគឺលុយក៏បាន រីឯបឹងក៏ជ្រៅ អាចស្តុកទឹកបានច្រើនទៀតផង ។
ទោះបីជាគ្រឿងចក្រត្រូវបានជម្លៀសចេញទាំងយប់ក៏ដោយ ក៏វោហាសាស្ត្រអាងខ្នងរបស់លោក កេត ម៉ៅ និងមន្ទីររ៉ែ និងថាមពល ខេត្តតាកែវ នៅតែឌឺដងព្រលយដាក់គ្នា ។ លោក កេត ម៉ៅ បាននិយាយថា ប្រធានមន្ទីររ៉ែ និងថាមពល លោក ផេង វុធ បានប្រើសហការីឲ្យមកយកលុយពីម្ចាស់គ្រឿងចក្រកាយអាចម៍ដីនៅបឹងអូរតាសុខ១០០ដុល្លារ ប៉ុន្តែម្ចាស់គ្រឿងចក្រមិនឲ្យ ទើបរឿងនេះបែកធ្លាយដល់អ្នកកាសែត ។ ការលើកឡើងរបស់លោក កេត ម៉ៅ យ៉ាងដូច្នេះគឺបញ្ជាក់ច្បាស់ថា មានគ្រឿងចក្រជីកកកាយយកអាចម៍ដី នៅចំណែកបឹងអូរតាសុខនោះមែន ។
រីឯលោកផេង វុធ ប្រធានមន្ទីររ៉ែ និងថាមពល ខេត្តតាកែវបាននិយាយថា លោកបានចុះស្រាវជ្រាវរឿងជីកកកាយដីនេះ មិនមែនទៅសុំលុយម្ចាស់គ្រឿងចក្រនោះទេ ។ លោកថា ការជីកកកាយយកអាចម៍ដី ដោយគ្មានច្បាប់នោះ គឺជាទង្វើខុសច្បាប់ ។
បើទោះបីជាគ្រឿងចក្រដកចេញពីបឹងអូរតាសុខ ស្ថិតនៅក្នុងឃុំសំរោង ស្រុកសំរោង ខេត្តតាកែវនោះហើយក៏ដោយ ប៉ុន្តែបញ្ហាប្រឈមនៅតែមាន ក៏ព្រោះតែលោកអភិបាលស្រុកអាងខ្នង ហើយមិនព្រមទទួលស្គាល់កំហុសរបស់ខ្លួន ។ មន្ទីរជំនាញ ដឹងថា វាជាកំហុសរបស់លោកអភិបាលស្រុក ដូច្នេះ ក៏ប្រឹងរុញរឿងនេះឲ្យកាន់តែផ្ទុះឡើង ពីព្រោះ ចង់បង្ហាញស្នាដៃ នៃភាពខ្លាំងរបស់ខ្លួនដែរ។ សម្រាប់ប្រជាពលរដ្ឋនៅស្រុកសំរោង ភាគច្រើនដឹងថា អ្វីដែលជាគោលដៅពិតប្រាកដរបស់លោក កេត ម៉ៅ ពោលគឺមិនមែនប្រជាពលរដ្ឋដែលត្រូវបានណែនាំឲ្យបដិសេធន៍ថា គ្មានការលក់បឹងនោះទេ ផ្ទុយទៅវិញ មនុស្សភាគច្រើនក្នុងស្រុកសំរោង រួមទាំងអភិបាលរងស្រុកពីររូបផ្សេងទៀតជាអ្នកដឹងការពិត ។
គេនិយាយថា លោកកេត ម៉ៅ ប្រើតែអភិបាលរងស្រុកម្នាក់ឈ្មោះ ទុយ គឹមស្រៀង អតីតមន្ត្រីគណបក្សហ្វ៊ុនស៊ីនប៉ិច ជិះម៉ូតូកញ្ចាស់ម្នាក់នោះតែប៉ុណ្ណោះ រីឯអភិបាលរងដទៃទៀត អង្គុយបៀមប៊ិកឡើងខៀវធ្មេញទៅហើយ… ៕ ហេង សូរិយា
