ចតរថយន្តដេកនៅចិញ្ចើមផ្លូវ ត្រូវជនសង្ស័យលួចទូរស័ព្ទបានសម្រេច ត្រូវប្រជាពលរដ្ឋឃើញទាន់ ចាប់ប្រគល់ឲ្យសមត្ថកិច្ច

ភ្នំពេញ៖ បុរសម្នាក់ជិះរថយន្តមួយគ្រឿ ងក្នុងសភាពស្រវឹងស្រា ហើយមកឈប់ដេកនៅចិញ្ចើមផ្លូវ ត្រូវបានជនសង្ស័យ២នាក់ ឆ្លៀតឱកាសលួចយកទូរស័ព្ទដៃមួយគ្រឿង ម៉ាកសាំសុង បានសម្រេចចៃដន្យ ត្រូវបានប្រជាពលរដ្ឋឃាត់ឃើញចាប់ឃាត់ខ្លួនបានម្នាក់ ។

ហេតុការណ៍នេះ បានកើតឡើងកាលពីវេលាម៉ោង២ និង១៥នាទី រំលងអធ្រាត្រ ឈានចូលថ្ងៃទី២៥ ខែមេសា ឆ្នាំ២០១៩ តាមបណ្តោយផ្លូវលេខ៥៣ នៅចំណុចផ្សារថ្មី ស្ថិតនៅក្នុងសង្កាត់ផ្សារថ្មី១ ខណ្ឌដូនពេញ រាជធានីភ្នំពេញ ។

ជនសង្ស័យមានឈ្មោះរុន ហៀង ភេតប្រុស ៣៥ឆ្នាំ ស្នាក់នៅគល់ស្ពានជ្រោយចង្វា មានស្រុកកំណើតភូមិ ទួលរកា ឃុំរអាង ស្រុកកំពង់សៀម ខេត្តកំពង់ចាម ។

តាមប្រភពព័ត៌មានពីសាក្សី ដែលគេឃើញហេតុការណ៍បានឲ្យដឹងថា មុនពេលកើតហេតុគេបានឃើញបុរសម្នាក់វ័យ ប្រហែលជា៤០ឆ្នាំ បើករថយន្តមួយគ្រឿង ម៉ាកហាយឡែនឌ័រ ពណ៌ស្លែ ពាក់ស្លាកលេខ ភ្នំពេញ 2W-8870 ដោយស្រវឹងស្រាខ្លាំងបើករថយន្តទៅមុខលែងរួច ទើបឈប់រថយន្តដេកនៅចិញ្ចើមផ្លូវនៅជិតផ្សារថ្មី ប្រហែលជាបានមួយសន្ទុះក្រោយមក ក៏លេចមុខជនសង្ស័យ២នាក់ ក្នុងនោះម្នាក់បានធ្វើសកម្មភាពលួចយកទូរស័ព្ទដៃរបស់ជនរងគ្រោះម៉ាកសាំសុងបានសម្រេច ហើយបម្រុងនឹងរត់គេចខ្លួន សំណាងអាក្រក់ មានប្រជាពលរដ្ឋគាត់ជិះម៉ូតូកាត់តាមផ្លូវនោះបានប្រទះឃើញ ក៏ដេញតាមចោរ ក្របួចជាប់ម្នាក់ និងម្នាក់ទៀតយកទូរស័ព្ទដៃរត់គេចខ្លួនបាត់ហើយ ភ្លាមៗនោះដែរ ជនសង្ស័យត្រូវបានប្រជាពលរដ្ឋព្រួចវាយមួយដៃមួយជើង បណ្តាលឲ្យរងរបួសយ៉ាងដំណំ ។

ក្រោយពេលកើតហេតុ ជនរងគ្រោះ គាត់អត់បានដាក់ពាក្យបណ្តឹងនោះទេ គ្រាន់តែបានប្រគល់ជនសង្ស័យទៅសមត្ថកិច្ចដើម្បីអប់រំទៅបានហើយ ៕ ធឿនព្រែកជ័យ