សារព័ត៌មាន នគរវត្ត តែងតែនាំមុខគេជានិច្ច
ភ្ណំពេញ៖ រថយន្តមិនស្គាល់ម៉ាក បុកម៉ូតូបុរសម្នាក់រួចកិនបែកក្បាល ស្លាប់នៅខណ្ឌជ្រោយចង្វា រួចមានជនឆ្លៀតឱកាសលើកយកម៉ូតូជនរងគ្រោះ និងលុយចំនួន៥០០ដុល្លារបន្ថែមទៀត យកទៅបាត់ ។
ហេតុការណ៍នេះ កើតឡើកាលពីម៉ោងជាង៧យប់ថ្ងៃពុធ ទី២២ ខែឧសភា ឆ្នាំ២០១៩ ស្ថិតនៅតាមបណ្តោយផ្លូវ មហាវិថី ឈ្នះ ឈ្នះ នៅក្នុងភូមិព្រែកតារត្ន័សង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ។
សមត្ថកិច្ចបានឲ្យដឹងថា ជនរងគ្រោះ(ស្លាប់)មានឈ្នោះ ហេង ពៅ អាយុ៣៨ឆ្នាំ មុខរបរបើករថយន្តដឹកសាំង ក្រុមហ៊ុនសូគីមុិច ស្នាក់នៅផ្ទះលេខ ៤៧៤ ផ្លូវលេខ៦ ភូមិក្តីចាស់ សង្កាត់បាក់ខែង ខណ្ឌជ្រោយចង្វា មានស្រុកកំណើតស្រុកកំពង់សៀម ខេត្តកំពង់ចាម។
ប្រភពព័ត៌មាននៅកន្លែងកើតហេតុបានឲ្យដឹងថា មុនកើត គេឃើញជនរងគ្រោះបើកម៉ូតូមួយគ្រឿងម៉ាកហុងដាវ៉ែវ ពណ៌ខ្មៅមិនចាំស្លាកលេខចេញពីធ្វើការ បំណងត្រឡប់ទៅផ្ទះ ដោយធ្វើដំណើរតាមបណ្តោយផ្លូវ វិមានឈ្នះ ឈ្នះ ក្នុងទិសដៅពីលិចទៅកើត ខណៈមកដល់ចំណុចកើតហេតុ មានរថយន្តមួយគ្រឿងមិនចាំម៉ាក បើកមកពីក្រោយបុកម៉ូតូជនរងគ្រោះរួចកិនពីលើបណ្តាលឲ្យ បែកក្បាលស្លាប់ នៅនឹងកន្លែង ហើយមានជនឆ្លៀតឱកាសបានលើកម៉ូតូជនរងគ្រោះជិះយកទៅបាត់ ។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញ ចរាចរចុះមកដល់កន្លែងកើតហេតុរួច ធ្វើកំណត់ហេតុប្រគល់សពជូនសាច់ញាតិ្តយកទៅស្រុកកំណើតធ្វើបុណ្យតាមប្រពៃណី ។
ចំណែកជនសង្ស័យដែលឆ្លៀតឱកាសយក ម៉ូតូជនរងគ្រោះទៅបាត់នោះ សមត្ថកិច្ចកំពុងស្រាវជ្រាវដើម្បីតាមចាប់ខ្លួនយកមកផ្តន្ទាទោសទៅតាមផ្លូវច្បាប់ ៕ ជ្រោយពេជ្រ
