សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរស២នាក់ម្នាក់ស្លាប់ភ្លាមៗ នៅកន្លែង និងម្នាក់ទៀត រងរបួសធ្ងន់ ដោយសារករណីគ្រោះថ្នាក់ចរាចរណ៍ ជិះម៉ូតូមិនប្រយ័ត្នបុកគូទរយន្តពីក្រោយស្របទិសគ្នាយ៉ាងពេញទំហឹងលាន់ដូចរន្ទះ កាលពីវេលាម៉ោង១ រំលង អធ្រាត្រ ឈានចូលថ្ងៃទី២៧ ខែឧសភា ឆ្នាំ២០១៩ លើកំណាត់ផ្លូវជាតិលេខ១ ស្ថិតក្នុងភូមិបាក់រនាស់ សង្កាត់សង្ឃ័រ ក្រុងស្វាយរៀង ខេត្តស្វាយរៀង ។
យោងតាមសមត្ថកិច្ចនគរបាលក្រុងស្វាយរៀងបានឲ្យដឹងថា បុរសដែលស្លាប់មានឈ្មោះ វ៉ោន សំណាង អាយុ ២០ឆ្នាំ មុខរបរកម្មកររោងចក្រ រស់នៅភូមិ ប្រសូត្រ ឃុំ ប្រសូត្រ ស្រុក ស្វាយទាបខេត្តស្វាយរៀង ចំណែកអ្នករងរបួសធ្ងន់ មានឈ្មោះ យស់ វ៉ាន់ណេត អាយុ២០ឆ្នាំ មុខរបរ កម្មកររោងចក្រ រស់នៅភូមិ ពោធិ៍វង្ស ឃុំ ប្រសូត្រ ស្រុក ស្វាយទាប ខេត្ត ស្វាយរៀង ខណៈជិះម៉ូតូម៉ាកហុងដា PCX ពណ៌ ខ្មៅ ខូចខាតយ៉ាងដំណំ ។
ប្រភពបន្តថា ចំណែកអ្នកបើករថយន្តមិនត្រូវបានស្គាល់ឈ្មោះនោះទេ ដោយដឹងថា បើករថយន្តប្រភេទ ដឹកទំនិញធុនធំ ហើយបានបើកគេចខ្លួនចេញពីកន្លែងកើតហេតុទិសខាងកើតផងដែរ ។
បើតាមសាក្សីបានឲ្យដឹងថា មុនកើតហេតុមានបុរស២នាក់ បានជិះម៉ូតូមួយគ្រឿងម៉ាកហុងដា PCX លើកំណាត់ផ្លូវជាតិលេខ១ ក្នុងទិសដៅពីលិចមកកើតដោយជិះខ្វះប្រុងប្រយ័ត្ន ស្រាប់តែទៅបុកគូទរថយន្តប្រភេទដឹកទំនិញធុនធំ ដែលបើកស្របគ្នាយ៉ាងពេញទំហឹងលាន់ដូចរន្ទះបង្កការភ្ញាក់ផ្អើលតែម្ដង ។
បច្ចុប្បន្ន មធ្យោបាយធ្វើដំណើរត្រូវបានសមត្ថកិច្ចមូលដ្ឋានយកមក រក្សាទុកនៅអធិការក្រុងស្វាយរៀង រីឯអ្នករបួស សម្រាកព្យាបាល នៅមន្ទីរពេទ្យខេត្តស្វាយរៀង ចំណែក សាកសពត្រូវបានសមត្ថកិច្ចប្រគល់ ឲ្យក្រុមគ្រួសារ យកទៅធ្វើបុណ្យតាមប្រពៃណី ៕ យឹម សុថាន
