សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តសាំយ៉ុងមួយគ្រឿង ដែលម្ចាស់ទុកនៅមុខផ្ទះហើយចូលទៅសម្រាកក្នុងផ្ទះ ស្រាប់តែមានជនសង្ស័យមកលួចយកទៅបាត់បង្កការភ្ញាក់ផ្អើលកាលពីវេលាម៉ោង២រំលងអធ្រាត្រ ឈានចូលថ្ងៃទី៥ ខែមិថុនា ឆ្នាំ២០១៩ នៅចំណុចមុខផ្ទះជនរងគ្រោះ ស្ថិតក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ ។
ជនរងគ្រោះឈ្មោះ ហួរ បុរី ភេទប្រុស អាយុ៣៨ឆ្នាំ មុខរបររត់តាក់ស៊ី រស់នៅភូមិអង្គសង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើតនៅភូមិព្រៃទំពូង ឃុំកញ្ចំ ស្រុកពារាំង ខេត្តព្រៃវែង ។ រថយន្តដែលបាត់ខាងលើម៉ាកសាំយ៉ុង ពណ៌ស ស៊េរីឆ្នាំ២០០២ ពាក់ស្លាកលេខ ភ្នំពេញ ២AP- ៩៣៥៤ ។
តាមប្រភពព័ត៌មានពីជនរងគ្រោះជាម្ចាស់រថយន្តបាននិយាយថា នៅមុនពេលកើតហេតុ កាលពីវេលាម៉ោង៩យប់ថ្ងៃទី៤ មិថុនា គាត់បានយករថយន្តខាងលើទៅចតទុកនៅខាងមុខផ្ទះរបស់គាត់ដូចសព្វដង លុះនៅវេលាម៉ោង១១និង៣០នាទីយប់ថ្ងៃដដែល គាត់បានឃើញរថយន្តនៅឡើយទេ ។ បន្ទាប់មកគាត់ក៏បានចូលទៅដេក ក្នុងផ្ទះបាត់ ។ លុះនៅវេលាម៉ោងកើតហេតុ ពេលគាត់ភ្ញាក់ដឹងខ្លួន បានចេញមកមើលរថយន្តនៅខាងមុខផ្ទះ ស្រាប់តែបាត់បង្កការផ្អើលឆោឡោតែម្ដង ហើយគាត់មកប្តឹងសមត្ថកិច្ចឲ្យជួយអន្តរាគមន៍ភ្លាមៗផងដែរ ។
តាមប្រភពពីជនរងគ្រោះបានបញ្ជាក់ទៀតថា ជារៀងរាល់ថ្ងៃ គាត់មិនដែលចាក់សាំងពេញនោះទេ តែដោយសារថ្ងៃស្អែក ត្រូវដឹកភ្ញៀវធ្វើដំណើរទៅតាមខេត្ត ទើបគាត់បានចាក់សាំងពេញរថយន្ត ដើម្បីត្រៀមដឹកភ្ញៀវ ស្រាប់តែត្រូវជនសង្ស័យលួចយករថយន្តទៅបាត់តែម្តង ។
ក្រោយពេលកើតហេតុ ជនរងគ្រោះបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅទី៣ដើម្បីឲ្យសមត្ថកិច្ចជួយរករថយន្តរបស់គាត់ផងដែរ ៕ សុខាសែនជ័យ
