សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជនម្នាក់បានស្លាប់ ពេលបញ្ជូនទៅមន្ទីរពេទ្យ និង២នាក់ទៀតរបួសធ្ងន់ ខណៈពួកគេជិះម៉ូតូលឿនដល់ចំណុចផ្លូវកោងមិនបន្ថយល្បឿន ក៏ជ្រុលបុករថយន្តបាញ់បេតុងពេញទំហឹងកាលពីវេលាម៉ោង១១ និង៣០នាទីយប់ ថ្ងៃទី៥ ខែមិថុនា ឆ្នាំ២០១៩ នៅចំណុចច្រមុះជ្រូកស្ទឹងមានជ័យ សង្កាត់ស្ទឹងមាន ខណ្ឌមានជ័យ ។
ជនរងគ្រោះដែលស្លាប់ឈ្មោះ សាន់ គឹមសាន ភេទប្រុស អាយុ១៩ ឆ្នាំ មានស្រុកកំណើតភូមិដើមដូង ឃុំក្រពុំឈូក ស្រុកកោះអណ្តែត ខេត្តតាកែវ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តប្រភេទបាញ់បេតុង ពាក់ស្លាកលេខ ភ្នំពេញ 5A 0957 ធ្វើដំណើរតាមបណ្តោយផ្លូវមុនីរ៉េត ក្នុងទិសដៅពីត្បូងទៅជើងហើយបានបត់ឆ្វេង បំណងទៅផ្លូវវេងស្រេងស្រាប់តែមានយុវជន៣នាក់ជិះម៉ូតូហុងដាឌ្រីមសង់ ស៊េរី ឆ្នាំ២០០៨ ពណ៌ខ្មៅ ពាក់ស្លាកលេខ ព្រៃវែង 1A 8333 ធ្វើដំណើរតាមបណ្តោយផ្លូវវេងស្រេង ក្នុងល្បឿនលឿនបួងចង្កូតមិនទាន់ ក៏ជ្រុលបុករថយន្តពេញទំហឹងបណ្តាលឲ្យរងរបួសធ្ងន់ធ្ងរ៣នាក់ ។ ភ្លាមនោះជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ តែដោយអកុសលជនរងគ្រោះម្នាក់បានស្លាប់ពេលបញ្ជូនទៅដល់មន្ទីរពេទ្យ ។
ក្រោយកើតហេតុសមត្ថកិច្ចមូលដ្ឋាន បានចុះមកដល់ចំណុចកើតហេតុ ទំនាក់ទំនងទៅជំនាញ វាស់វែងយករថយន្ត និងម៉ូតូយកទៅចរាចរណ៍ជើងគោករាជធានីភ្នំពេញ រង់ចាំដោះស្រាយពេលក្រោយ ៕ សុខាសែនជ័យ
