សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនជាតិចិនមួយក្រុម បើករថយន្តស៊េរីទំនើបមួយគ្រឿងល្មើសច្បាប់ចរាចរត្រូវបាន សមត្ថកិច្ចចរាចរឃាត់ ដើម្បីអប់រំ ស្រាប់តែជនជាតិចិនទាំងនោះ មិនព្រមឈប់បានបើករថយន្តទៅមុខ ថែមទាំងបើកកៀរសមត្ថកិច្ចទៀតផង តែសំណាងល្អសមត្ថកិច្ចមិនមានអ្នករងរបួស ហើយត្រូវបានសមត្ថកិច្ចឃាត់បានហៅមិនព្រមចុះពីរថយន្ត ត្រូវសមត្ថកិច្ចហៅរថយន្តស្ទួចមកស្ទួចទាំងរថយន្ត និងជនជាតិចិនទាំងនោះ យកទៅការិយាល័យចរាចរក្រុង ។
ហេតុការណ៍នេះ បានកើតឡើងកាលពីម៉ោងជាង២រសៀល ថ្ងែទី៤ ខែមិថុនា ឆ្នាំ២០១៩ ក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ ។
សមត្ថកិច្ចចរាចរក្រុង ដែលដាក់គោលដៅស្តុបផ្លូវត្រសក់ផ្អែម បានឲ្យដឹងថា មុនពេលកើតហេតុ គឺមានបុរសជនជាតិចិនម្នាក់បើករថយន្តស៊េរីទំនើប ពណ៌ខ្មៅ ពាក់ស្លាកលេខ ភ្នំពេញ 2AM.2666 និងអ្នករួមដំណើរចំនួន៥នាក់ បានបើកបញ្រ្ចាសទិសដៅចរាចរ តាមបណ្ដាលផ្លូវនរោត្តម ហើយសមត្ថកិច្ច បានឃាត់ឲ្យចូលអែបកៀន ស្រាប់តែជនជាតិចិននោះ មិនបើកអែបកៀនទេ ថែមទាំងបើកកៀសមត្ថកិច្ច រួចបន្តបើទៅមុខទៀត ។
សមត្ថកិច្ច បន្តថា ឃើញដូច្នេះ សមត្ថកិច្ចបានជិះម៉ូតូដេញតាមពីក្រោយ លុះមកដល់ស្តុបត្រសក់ផ្អែម សមត្ថកិច្ចស្រែកឲ្យឈប់ ជនជាតិចិននោះ ក៏មិនឈប់ ទើបសមត្ថកិច្ចសម្រេចចិត្តឈប់ម៉ូតូពីមុខរថយន្ត កុំឲ្យបើកទៅមុខបន្ត ហើយប្រាប់ឲ្យចុះមកតែមិនចុះទៀត ថែមទាំងដកទូរស័ព្ទថតសមត្ថកិច្ចទៀត ហើយសមត្ថកិច្ចព្យាយាមសម្រួលឲ្យពួកគេចុះ ដើម្បីអប់រំអស់រយៈពេលជិត២ម៉ោង ជនជាតិចិនទាំងនោះមិនព្រមចុះទៀត ទើបសមត្ថកិច្ចហៅរថយន្តស្ទួចមកស្ទួចទាំងរថយន្ត និងជនជាតិចិនទាំងនោះ យកទៅការិយាល័យចរាចរក្រុង ដើម្បីចាត់ការបន្តតាមនីតិវិធី ៕ ជ្រោយពេជ្រ
