សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោក ឃួង ស្រេង អភិបាលរាជធានីភ្នំពេញ បានបញ្ជាក់ឲ្យដឹង នៅក្នុងពិធីចូលរួមហូបនំបញ្ចុក ជាមួយកម្មករ កម្មការរិនី ប្រជាពលរដ្ឋ ១៦២០នាក់នៅសង្កាត់ចោមចៅទី២ ខណ្ឌពោធិ៏សែនជ័យ កាលពីថ្ងៃអាទិត្យ៧កើត ខែជេស្ឋ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៩ មិថុនា ឆ្នាំ២០១៩ នេះថា៖ នៅពេលនេះ លោកកំពុងសុំដីកាពីតុលាការ ដើម្បីតាមចាប់ខ្លួនម្ចាស់ក្លឹបកម្សាន្ដ លុច្សសារី ដែលកម្លាំងសមត្ថកិច្ចចុះបង្ក្រាបនៅយប់ឈានចូលថ្ងៃទី០៨ ខែមិថុនា ឆ្នាំ២០១៩ ពាក់ព័ន្ធករណីគ្រឿងញៀន ដោយឃាត់ខ្លួនបាន មនុស្សជាង ៤០០នាក់ ។
ក្នុងឱកាសអញ្ជើញដឹកនាំកម្មករ កម្មការិនី ហូបនំបញ្ចុកសាមគ្គីជាតិ នៅខណ្ឌពោធិ៍សែនជ័យ នេះ លោក ឃួង ស្រេង បានបញ្ជាក់ថា៖ កន្លងទៅអាជ្ញាធរធ្លាប់បានណែនាំជាច្រើនលើកច្រើនសារហើយ ដល់ម្ចាស់ទីតាំងក្លឹបកម្សាន្ដខាងលើនេះ ប៉ុន្ដែហាក់គ្មានប្រសិទ្ធភាពនោះទេ ពោលម្ចាស់ទីតាំងនៅបន្ដបើកដដែលមិនថា យប់ថ្ងៃនោះឡើយ ដោយបង្កការរំខានយ៉ាងខ្លាំងដល់ប្រជាពលរដ្ឋ សិស្សនិស្សិត រហូតប៉ុន្មានថ្ងៃមុននេះ មានករណីបាញ់បោះផងដែរ ។
លោកបានបញ្ជាក់ថា៖ នៅពេលនេះយើងកំពុងសុំដីកាពីតុលាការ ដើម្បីតាមចាប់ម្ចាស់ក្លឹបយកផ្តន្ទាទោសតាមច្បាប់ ។
ជាមួយគ្នានេះ លោកឧត្តមសេនីយ៍ទោ ភួង ម៉ាល័យ ស្នងការរងនគរបាលរាជធានីភ្នំពេញ ក៏បានបញ្ជាក់ថា៖ គិតរហូតមកដល់ពេលនេះ មនុស្សដែលសមត្ថកិច្ចឃាត់ខ្លួនទាំង៤០០នាក់នោះ កំពុងធ្វើការពិនិត្យទឹកនោមដើម្បីស្វែងរកសារធាតុញៀនជិតរួចរាល់ហើយ ។ យ៉ាងណាក៏ដោយ លោកឧត្តមសេនីយ៍ទោ ភួង ម៉ាល័យ មិនទាន់អាចបញ្ជាក់ថា តើមានមនុស្សប៉ុន្មាននាក់ដែល មានសារធាតុញៀន នៅក្នុងខ្លួននោះទេ? ។ ប៉ុន្ដែសមត្ថកិច្ចកំពុងតែដុតដៃដុតជើងលើកការងារនេះ ឲ្យទៅតាមនីតិវិធី ។ ទន្ទឹងនឹងនេះ សមត្ថកិច្ចពាក់ព័ន្ធក៏មិនទាន់បានបង្ហាញអំពីអត្ដសញ្ញាណម្ចាស់ទីតាំងក្លឹប «លុច្សសារី» ថាឈ្មោះអ្វី ហើយមានតួនាទីម្ចាស់នោះទេ ។
សូមបញ្ជាក់ថា៖ កម្លាំងនគរបាល នៃស្នងការដ្ឋាននគរបាលរាជធានីភ្នំពេញ ក្រោមការបញ្ជាផ្ទាល់ពី នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និងដឹកនាំកម្លាំងប្រតិបត្តិការដោយ លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការរាជធានីភ្នំពេញ បានបើកប្រតិបត្តិការទាំងកណ្តាលអធ្រាត្រចុះឆែកឆេរក្លឹបកម្សាន្ត លុច្សសារី រកឃើញថ្នាំញៀនមួយចំនួន និងឃាត់ខ្លួនអ្នកចូលលេងកម្សាន្តក្នុងក្លឹបជាង ៤០០ នាក់ ។ ប្រតិបត្តិការចុះឆែកឆេរក្លឹបកម្សាន្តកណ្តាល រាជធានីភ្នំពេញនេះ បានធ្វើឡើងនៅវេ លាម៉ោងប្រមាណ៤រំលងអាធ្រាត្រឈានចូលថ្ងៃទី០៨ ខែមិថុនា ឆ្នាំ២០១៩ ។ ក្លឹបកម្សាន្ត «លុច្សសារី» ស្ថិតនៅតាមបណ្ដោយផ្លូវលេខ២១៤ កែងផ្លូវ៦៣ សង្កាត់បឹងរាំង ខណ្ឌដូនពេញ ។
ក្រោយការឆែកឆេរកម្លាំងសមត្ថកិច្ចបានបិទក្លឹបជាបណ្តោះអាសន្ន និងបាននាំអ្នកលេងកម្សាន្តប្រមាណ ៤០០នាក់ទៅស្នងការដ្ឋាននគរបាលរាជធានីភ្នំពេញ ។ បើតាមប្រភពពីសមត្ថកិច្ចអ្នកលេងកម្សាន្តក្នុងក្លឹបនេះភាគច្រើនជនជាតិចិន និងវៀតណាម ។ ក្លឹប កម្សាន្ត «លុច្សសារី» ជាក្លឹបកម្សាន្តមួយ ក្នុងចំណោមក្លឹបកម្សាន្តជាច្រើននៅក្នុងរាជធានីភ្នំពេញ ដែលត្រូវបានបិទជាបន្តបន្ទាប់ក្រោយពីសមត្ថកិច្ច បានចូលឆែកឆេររកឃើញមានការជួញដូរ និងប្រើប្រាស់គ្រឿងញៀន ចាប់តាំងពីលោក ស ថេត ចូលកាន់តំណែងជាស្នងការនគរបាលរាជធានីភ្នំពេញ កាលពីចុងឆ្នាំ២០១៨ ។
ប្រតិបត្តិការចុះឆែកឆេរក្លឹបកម្សាន្ត «លុច្សសារី» បានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីមានករណីបុរសម្នាក់ចូលទៅលេងក្នុងក្លឹបនេះ ហើយ មានការផ្ទុះអាវុធបណ្តាលឱ្យនារីម្នាក់រងរបួសភ្លៅ៕ សំរិត
