រថយន្ដធុនធំ២គ្រឿង បើកបុកគ្នាពេញមួយទំហឹង បណ្ដាលឲ្យរថយន្ដខូចខាតធ្ងន់ តែមិនបង្កគ្រោះថ្នាក់ដល់មនុស្សទេ

ខេត្តកណ្ដាល៖ រថយន្ដធុនធំ២គ្រឿង ទទួលរងការខូចខាតធ្ងន់ធ្ងរ បន្ទាប់ពីបើកបុកគ្នាពេញមួយទំហឹង នៅលើកំណាត់ផ្លូវជាតិលេខ៨ ចន្លោះគីឡូម៉ែត្រលេខ៣០-៣១ ស្ថិតក្នុងភូមិសន្លុង ឃុំសន្លុង ស្រុកខ្សាច់កណ្ដាល ខេត្តកណ្ដាល ។

មន្រ្ដីនគរបាលចរាចរណ៍ស្រុកខ្សាច់កណ្ដាលបានឲ្យដឹងថា ករណីខាងលើនេះ បង្កឡើងដោយរថយន្ដម៉ាក KIA ពណ៌ទឹកសមុទ្រ ពាក់ស្លាកលេខ ក.៦៩៨៨.ភព៣ អ្នកបើកបរមិនស្គាល់អត្តសញ្ញាណ (គេចខ្លួន) ។ ចំណែកឯរថយន្ដម្ខាងទៀតម៉ាកHYUNDAI ពណ៌ស ពាក់ស្លាកលេខ កំពង់ចាម 3A-4622 បើកបរដោយឈ្មោះ សេង ភាស់ ភេទប្រុស អាយុ៣០ឆ្នាំ មានទីលំនៅភូមិទួល ឃុំស្វាយរពា ស្រុកបរសែត ខេត្តកំពង់ស្ពឺ ។

ប្រភពដដែលបន្ដថា នៅមុនពេលកើតហេតុ សាក្សីបានឃើញរថយន្ដបង្កម៉ាកKIA បើកបរតាមបណ្ដោយផ្លូវជាតិលេខ៨ ក្នុងទិសដៅពីត្បូងទៅជើង លុះមកដល់ចំណកើតហេតុ បានបន្ថែមល្បឿនល្បឿន វ៉ាជែងរថយន្ដមួយគ្រឿងទៀត បើកនៅខាងមុខ តែវ៉ាមិនផុត ក៏បានជ្រុលទៅបុកជាមួយរថយន្ដមួយគ្រឿងទៀតម៉ាកHYUNDAIបើកច្រាស់ទិសគ្នា ពេញមួយទំហឹង បណ្ដាលឲ្យរថយន្ដទាំង២គ្រឿងខូចខាតធ្ងន់ធ្ងរ តែពុំបង្កឲ្យមានមនុស្សណាម្នាក់រងរបួសអ្វីឡើយ ។

ក្រោយពីមានហេតុការណ៍កើតឡើង នគរបាលជំនាញស្រុក បានចុះមកធ្វើការអន្ដរាគមន៍កន្លែងកើតហេតុ រួចពិនិត្យវាស់វែង កសាងឯកសារដកហូតរថយន្ដទាំង២គ្រឿងយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមនីតិវិធីច្បាប់ ៕ ស្អាងជ័យ