សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលស៊ីរីបានសម្រេចផ្តល់សិទ្ធិគ្រប់គ្រងកំពង់ផែ ដែលមានកម្លាំងទាហានជើងទឹករុស្ស៊ីឈរជើងនៅទីនោះ ។ នេះជារឿងមួយដ៏ល្អបំផុត ដើម្បីរក្សាទាហានរុស្ស៊ីជួយការពារទឹកដីស៊ីរី ។
សារព័ត៌មានជាតិស៊ីរី SANA កាលពីថ្ងៃទី១២ ខែមិថុនា បានផ្សាយថា សភាប្រទេសនេះ បានសម្រេចផ្តល់សិទ្ធិគ្រប់គ្រង កំពង់ផែដ៏ធំបំផុតគឺ Tartus ឲ្យទៅក្រុមហ៊ុន Stroytransgaz របស់រុស្ស៊ី ។ តាមកិច្ចព្រមព្រៀងខាងលើរុស្ស៊ីនឹងគ្រប់គ្រង កំពង់ផែខាងលើ ក្នុងរយៈពេល៤៩ឆ្នាំ។
តាមកិច្ចព្រមព្រៀងរវាង ទីក្រុង Damascus និងក្រុមហ៊ុន Stroytransgaz ស្តីពីការគ្រប់គ្រងកំពង់ផែ Tartus ដែលបានចុះហត្ថលេខាកាលពីខែមេសាកន្លងមក ។ នេះជាកិច្ចព្រមព្រៀង ដ៏សំខាន់រវាងរដ្ឋាភិបាលទីក្រុង Damascus និងទីក្រុង Moscow ។ ទីតាំងកំពង់ផែខាងលើ របស់ស៊ីរី មានទីតាំងទាហានជើងទឹក របស់រុស្ស៊ីនៅទីនោះ។
តាមកិច្ចព្រមព្រៀង គណៈកម្មការគ្រប់គ្រង មាន៦រូបដើម្បីត្រួតពិនិត្យ ដំណើរការកំពង់ផែខាងលើ ដោយរុស្ស៊ីមាន៣រូប និងស៊ីរី៣រូប។ ជាមួយគ្នានោះក្រុមហ៊ុន Stroytransgaz ទទួលបានការលើកលែងពន្ធ នាំចូល ក្នុងរយៈពេល ៦ឆ្នាំ ពេលកំពង់ផែកំពុងតែពង្រីក។
នេះជារឿងដ៏ល្អបំផុត សម្រាប់សេដ្ឋកិច្ច និងយោធារបស់រុស្ស៊ី ហើយទីតាំងទាហានជើងទឹករបស់រុស្ស៊ី ឈរជើងនៅកំពង់ផែ Tartus អាចបន្តទៅមុខទៀត បើទោះបីស៊ីរីទទួលបានសន្តិភាព បញ្ជប់សង្គ្រាមហើយក្តី៕
