ឃាត់ខ្លួនជនសង្ស័យ២នាក់ ករណីលួចមានស្ថានទម្ងន់ទោស (ឆក់យកកាបូបបលុយ និងទូរសព្ទ័ដៃ)

ភ្នំពេញ៖ នៅថ្ងៃទី២៧ ខែមិថុនា ឆ្នាំ២០១៩ ម៉ោង១៧ និង០០នាទី ប៉ុស្តិ៍រដ្ឋបាលភ្នំពេញថ្មី បានឃាត់ខ្លួនជនសង្ស័យ២នាក់ ករណីលួចមានស្ថានទម្ងន់ទោស (ឆក់យកកាបូបបលុយ និងទូរសព្ទ័ដៃ) កាលពីថ្ងៃទី២៦ ខែមិថុនា ឆ្នាំ២០១៩ វេលាម៉ោង ១៨ និង៣០នាទី នៅចំណុចមុខរោងចក្រសាំហាន់ ផ្លូវបេតុង ភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ ។

ជនសង្ស័យ ០២នាក់ រួមមាន៖ ១-ឈ្មោះ ស៊ិន ស័ក្កិសិទ្ធ ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅបន្ទប់ជួល ផ្លូវបេតុង ភូមិពោងពាយ សង្កាត់ភ្នំពេញថ្មី ខណ្ឌសែនសុខ (គ្មានសារធាតុញៀន) ២-ឈ្មោះ យ៉ែម សាក់សិទ្ធ ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះសង់ថ្មី ផ្លូវបេតុង ភូមិគោកឃ្លាង សង្កាត់គោកឃ្លាង ខណ្ឌសែនសុខ (មានសារធាតុញៀន) ។

សម្ភារបន្សល់ទុក ៖ ទូរសព្ទ័ដៃ០១គ្រឿង ម៉ាកOPPO របស់ជនរងគ្រោះ និងម៉ូតូ០១គ្រឿង ម៉ាកនិក ពណ៌ស ផលិតឆ្នាំ២០១៩ ពាក់ស្លាកលេខ ភ្នំពេញ 1HM-2230 របស់ជនសង្ស័យ ។

សម្ភារបាត់បង់ ៖ លុយខ្មែរចំនួន ២០០.០០០រៀល របស់ជនរងគ្រោះ ។

មុនពេលកើតហេតុថ្ងៃទី២៧ ខែមិថុនា ឆ្នាំ២០១៩វេលាម៉ោង ១៧ និង០០នាទី ប៉ុស្តិ៍រដ្ឋបាលភ្នំពេញថ្មី បានល្បាតដល់ភូមិទំនប់ សង្កាត់ភ្នំពេញថ្មី ខណ្ឌសែនសុខ បានឃើញជនសង្ស័យ ចំនួន០២នាក់កំពុងជិះម៉ូតូ១គ្រឿងឌុបគ្នាតាមផ្លូវ ដោយមានការសង្ស័យកម្លាំងល្បាតបានហៅជនសង្ស័យឲ្យឈប់ធ្វើការត្រួតពិនិត្យ និងសួរនាំ រួចជនសង្ស័យទាំង២នាក់ បានសារភាពថាពួកខ្លួនធ្លាប់បានធ្វើសកម្មភាពឆក់យកកាបូបលុយ និងទូរសព្ទ័ដៃ ពីជនរងគ្រោះជិះម៉ូតូតាមផ្លូវ កាលពីថ្ងៃទី២៦ ខែមិថុនា ឆ្នាំ២០១៩ ចំណុចមុខរោងចក្រសាំហាន់ ផ្លូវបេតុង ភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ ។ បន្ទាប់មកសមត្ថកិច្ចបាននាំខ្លួនជនសង្ស័យយកមកសួរនាំ នៅអធិការដ្ឋាននគរបាលខណ្ឌសែនសុខតែម្តង ។

បច្ចយប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីចាត់ការតាមច្បាប់ ៕ តុង សីហា