បើករថយន្តបុកក្បាលនាគពុះចែកទ្រូវបាក់អស់មួយកង់ ហើយទុករថយន្តចោល រត់គេចខ្លួនបាត់

ភ្នំពេញ៖ បុរសម្នាក់សង្ស័យស្រវឹងស្រា បើករថយន្តតូយូតាព្រូសមួយគ្រឿង ទៅបុកក្បាលនាគពុះចែកទ្រូវផ្លូវបាក់អស់មួយកង់ រថយន្តបង្កខូចខាតផ្នែកខាងមុខយ៉ាងដំណំ ទៅមុខលែងរួច ។

ហេតុការណ៍នេះ កើតឡើងកាលពីវេលាម៉ោង១១និង១០នាទីយប់ ថ្ងៃទី២៤ ខែកក្កដា ឆ្នាំ២០១៩ ស្ថិតនៅតាមបណ្តោយផ្លូវម៉ៅសេទុង កែងនឹងផ្លូវ១៩៩ ក្នុងសង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតគេឃើញបុរសម្នាក់ បើករថយន្តតូយូតាព្រូសពណ៌សមួយគ្រឿង ពាក់ស្លាកលេខ ភ្នំពេញ 2AJ-5972 ធ្វើដំណើរតាមបណ្តោយផ្លូវម៉ៅសេទុង ទិសដៅពីត្បូងទៅជើង ខណៈមកដល់ចំណុចកើតហេតុខាងលើ ផ្លូវបែកជាបួនកែងនឹងផ្លូវ១៩៩ បានរេចង្កូតមកខាងឆ្វេងដៃជ្រុលទៅបុកក្បាលនាគពុះចែកទ្រូវផ្លូវពេញទំហឹង បណ្តាលក្បាលនាគពុះចែកទ្រូងផ្លូវបាក់អស់មួយកង់ចំណែករថយន្តបង្កខ្ទេចផ្នែកខាងមុខខាងឆ្វេងទៅមុខលែងរួច ។ ភ្លាមៗនោះ ម្ចាស់រថយន្តឃើញសភាពមិនស្រួលបានទុករថយន្តចោលរួចគេចខ្លួនពីកន្លែងកើតហេតុបាត់ស្រមោល ។

ក្រោយកើតហេតុ សមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញ ចុះមកវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយគ្នាទៅតាមផ្លូវច្បាប់ ៕ ភារ៉ា ដង្កោ