ជម្លោះគ្រឿងញៀនឈានដល់ចាក់គ្នា ធ្វើឲ្យបុរសម្នាក់ស្លាប់ ពេលបញ្ជូនទៅសង្គ្រោះនៅមន្ទីរពេទ្យ

ខេត្តបន្ទាយមានជ័យ៖ កម្លាំងអាវុធហត្ថក្រុងប៉ោយប៉ែត ឃាត់ខ្លួនជនសង្ស័យម្នាក់ទាញដែកឆាប ចាក់សម្លាប់ជនរងគ្រោះក្នុងករណីជម្លោះគ្រឿងញៀន កាលពីវេលាម៉ោង២និង៣០នាទីរំលងអធ្រាត្រ ឈានចូលថ្ងៃទី២៤ ខែកក្កដា ឆ្នាំ២០១៩ នៅក្នុងភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ។

ជនសង្ស័យឈ្មោះ វាន់ តាក់ ភេទប្រុស អាយុ ១៩ឆ្នាំ មុខរបរជាបុគ្គលិកផ្នែកអនាម័យ នៅក្នុងកាស៊ីណូ DNA ស្តារ រស់នៅក្នុងភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ចំណែកជនរងគ្រោះមានឈ្មោះ សុខ វិទូ ភេទប្រុស អាយុ ២៥ឆ្នាំ ទីលំនៅមិនពិតប្រាកដ ស្នាក់នៅក្នុងភូមិកើតហេតុខាងលើ ។

ក្រោយពីកម្លាំងកងរាជអាវុធហត្ថឃាត់ខ្លួន ជនសង្ស័យបានសារភាពថា៖ មុននឹងខ្លួន ឈានដល់ការចាក់សម្លាប់ជនរងគ្រោះ ព្រោះជនរងគ្រោះមិនព្រមលក់គ្រឿងញៀនឲ្យ ថែមទាំងវាយខ្លួនយកលុយទៀតនោះ ខណៈខ្លួនកំពុងស្រវឹង ទើបខឹងសម្បា ទាញដែកឆាបពីក្នុងហោប៉ៅ ចាក់ត្រង់ពោះផ្នែកខាងស្តាំមួយដែកឆាប បណ្តាលឲ្យរបួសធ្ងន់ បានស្លាប់ ខណៈបញ្ជូនទៅកាន់មន្ទីរពេទ្យ ។

ក្រោយពីកើតហេតុ សាកសពជនរងគ្រោះត្រូវបានដំកល់ទុកនៅមន្ទីរពេទ្យបង្អែកប៉ោយប៉ែត២ ចំណែកជនសង្ស័យសមត្ថកិច្ចអាវុធហត្ថមូលដ្ឋានក្រុងប៉ោយប៉ែត កសាងសំណុំរឿងបញ្ជូនទៅទីបញ្ជាការដ្ឋានអាវុហត្ថចាត់ការបន្ត ៕ នីមវណ្ណា