សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ជិះមួយគ្រឿងបញ្ច្រាសទិសចរាចរណ៍ បានជ្រុលទៅបុកម៉ូតូមួយគ្រឿងបញ្ច្រាសទិសដៅគ្នា ពេញទំហឹងបណ្តាលឲ្យសន្លប់ស្តូកស្តឹងទាំងពីរនាក់ ។
ហេតុការណ៍នេះ កើតឡើងកាលពីវេលាម៉ោង១០ និង១០នាទីយប់ ថ្ងៃទី២៩ ខែកក្កដា ឆ្នាំ២០១៩ ស្ថិតនៅចំណុចមុខ ក្លឹបកម្សាន្ត ស៉្បាយឌើ តាមបណ្តោយផ្លូវចោមចៅ ក្នុងសង្កាត់ចោមចៅទី១ ខណ្ឌពោធិសែនជ័យ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញបុរសម្នាក់ជិះម៉ូតូមួយគ្រឿងម៉ាកឌ្រីមសង់ស៊េរី២០១៨ ពណ៌ខ្មៅពាក់ស្លាកលេខ ព្រៃវែង 1M-1440 ធ្វើដំណើរទិសដៅពីកើតទៅលិចបញ្ច្រាសទិសដៅចរាចរណ៍ ខណៈមកដល់ចំណុចកើតហេតុខាងលើ បានជ្រុលទៅបុកជាមួយម៉ូតូមួយគ្រឿងម៉ាកហុងដាឌ្រីមសង់ស៊េរី២០១៩ ពណ៌ខ្មៅពាកស្លាកលេខ ភ្នំពេញ 1HO-8987 ជិះដោយបុរសម្នាក់បញ្ច្រាសទិសដៅគ្នាពីលិចទៅកើតពេញទំហឹងបណ្តាលភាគីទាំងសងខាងសន្លប់ស្តូកស្តឹងនៅ នឹងកន្លែងកើតហេតុ ភ្លាមៗនោះ ក៏មានរថយន្តសង្គ្រោះបានបើកមកដល់ស្រាប់តែខាងភាគីម៉ូតូសង់ ២០១៩ បើកត្រូវទិសដៅចរាចរណ៍ងើបឡើងវិញ ចំណែកខាងភាគីម៉ូតូសង់២០១៨បើកបញ្ច្រាសទិសចរាចរណ៍ត្រូវបានរថយន្តសង្គ្រោះបន្ទាន់ដឹកយកទៅង្គ្រោះ ភ្លាមៗ ។
ក្រោយកើតហេតុសមត្ថកិច្ចមូលដ្ឋានបាន ចុះមកវាស់វែងយកម៉ូតូទាំងពីរគ្រឿង ទៅរក្សាទុកនៅប៉ុស្តិ៍នគរបាលរដ្ឋចោមចៅទី១ បណ្តោះអាសន្ន រង់ចាំដោះស្រាយគ្នាទៅពេលក្រោយ ៕ សុខាសែនជ័យ
