ស្រ្ដីម្នាក់ស្លាប់ និង៣នាក់រងរបួសធ្ងន់ និងស្រាលក្នុងហេតុការណ៍រថយន្តបុកគ្នា​

ខេត្តកំពង់ធំ៖ គ្រោះថ្នាក់ចរាចរណ៍រវាងរថយន្តបុករថយន្តក្នុងទិសដៅស្របគ្នាពីត្បូងទៅជើង បណ្តាលឲ្យស្រ្ដីម្នាក់ស្លាប់ និង៣នាក់រងរបួសធ្ងន់និងស្រាល ខូចរថយន្ត២គ្រឿង ។ ហេតុការណ៍នេះ បានកើតឡើងកាលពីវេលាម៉ោង២១និង២៤នាទី ថ្ងៃចន្ទ ៥កើត ខែស្រាពណ៍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៥ ខែសីហា ឆ្នាំ២០១៩ លើកំណាត់ផ្លូវជាតិលេខ៦ ចន្លោះគីឡូម៉ែត្រលេខ ៩៥-៩៦ ចំណុចវាលសសៃ ភូមិសូយោង ឃុំសូយោង ស្រុកតាំងគោក ខេត្តកំពង់ធំ ។

សមត្ថកិច្ចបានឲ្យដឹងថា រថយន្តម៉ាកវីស្តូ ពណ៌ក្រហម ពាក់ស្លាកលេខបាត់ដំបង 2A.7213 បើកបរដោយឈ្មោះសុខ ដា ភេទស្រី អាយុ៣៣ឆ្នាំ រស់នៅខេត្តបាត់ដំបង (របួសធ្ងន់ រយះថ្ងាស់ស្ដាំនិងបាក់ដងកាំបិតស្ដាំ) ។ អ្នករួមដំណើរចំនួន០៣នាក់: ១-ឈ្មោះ តែម ស្រីតូច ភេទស្រី អាយុ២៤ឆ្នាំ នៅភូមិចំប៉ាពោធិ៍ ឃុំស្វាយពោធិ៍ស្រុកស្រីសន្ធរ ខេត្តកំពង់ចាម ( របួសធ្ងន់ បាក់កដៃឆ្វេង) ។ ២- ឈ្មោះឌី ដានី ភេទស្រី អាយុ២២ឆ្នាំនៅភមិឃុំជាមួយឈ្មោះ តែម ស្រីតូច(របួសស្រាល) ។ ៣-ឈ្មោះ និងអសយដ្ឋានមិនស្គាល់ (ស្លាប់នៅកន្លែងកើតហេតុ) ។ សពដំកល់ទុកនៅវត្តខ្លុយ ឃុំសូយោង ស្រុកតាំងគោក ខេត្តកំពង់ធំ ដើម្បីស្រាវជ្រាវរកក្រុមគ្រួសារ ។

រថយន្ដម្ខាងទៀត ម៉ាករថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ កំពង់ធំ 3A.0808 (ដឹកស្រាបៀរ) អ្នកបើកបរមិនស្គាល់អត្តសញ្ញាណគេចខ្លួនបាត់ ។ វត្ថុតាងរថយន្តទាំងពីរគ្រឿងយករក្សាទុកនៅអធិការដ្ឋាននគរបាលស្រុកតាំងគោក ។ មូលហេតុបង្កដោយអ្នកបើកបររថយន្តម៉ាកវីស្តូបើកបរមានល្បឿនលឿន ខ្ជីខ្ជារខ្វះគ្មានការប្រុងប្រយ័ត្នទៅបុកគូទរថយន្តម៉ាកហ៊ីយ៉ាន់ដាយពីក្រោយ ៕ ប៊ុនរិទ្ធី