សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ បុរសខ្វិននិងពិការងគ្រោះម្នាក់ បានបាត់បង់ជីវិតក្នុងអណ្តាតភ្លើងឆេះលំនៅឋាន កាលពីវេលាម៉ោង២៣៖២០នាទី ថ្ងៃទី២១ ខែសីហា ឆ្នាំ២០១៩ ស្ថិតនៅភូមិល្វាលើឃុំស្ដៅ ស្រុកកងមាស ខេត្តកំពង់ចាម ខណៈម្តាយបានសង្ស័យទៅលើកូនគាត់ជាអ្នកដុត ដោយសំអាងថា កន្លងមកជាច្រើនដងមកហើយបានលួចដុតតែត្រូវបានក្រុមគ្រួសារ និងអ្នកជិតខាងជួយអន្តរាគមន៍ទាន់ពេល ។
តាមរយៈរបាយការណ៍របស់សមត្ថកិច្ចឲ្យដឹងថា ផ្ទះដែលត្រូវឆេះបំផ្លាញដោយអគ្គីភ័យខាងលើនេះ មានទំហំ៦ម៉ែត្រគុណ៨ម៉ែត្រ ធ្វើអំពីឈើប្រក់សង្កសី ជញ្ជាំងស្លឹក ជាកម្មសិទ្ធិរបស់ឈ្មោះ ហុក បាក់ឡេង ភេទស្រី អាយុ៦៣ឆ្នាំ រស់នៅទីកើតហេតុខាងលើ ។
ម្តាយបានរៀបរាប់ប្រាប់សមត្ថកិច្ចថា កូនប្រុសគាត់ឈ្មោះ ស៊ុន លាងហ៊ាន់ អាយុ៤០ឆ្នាំ បានស្លាប់ក្នុងហេតុការណ៍ឆេះផ្ទះ ព្រោះតែពិកា និងខ្វិនដេកម្នាក់ឯង ព្រមទាំងបាត់បង់អស់សម្ភារ:មួយចំនួនមាន (ម៉ូតូសង់កូរ៉េ១គ្រឿង, ម៉ាសុីនសាំងបូមទឹក១គ្រឿង , លុយ១០០ដុល្លារ , និងសម្ភារៈប្រើប្រាស់ក្នុងគ្រួសារមួយចំនួនទៀត ត្រូវឆេះអស់ទាំងស្រុង) ។
ជុំវិញហេតុការណ៍ឆេះផ្ទះខាងលើនេះ ម្តាយបានអះអាងប្រាប់ទៀតថា ចំពោះមូលហេតុ គាត់សង្ស័យថាកូនប្រុសរបស់គាត់ជាអ្នកលួចដុត ព្រោះមានជំងឹរាំរៃ និងធ្លាប់បានដុតកន្លងមកជាច្រើនដង ប៉ុន្តែត្រូវបានក្រុមគ្រួសារ និងអ្នកជិតខាងជួយទាន់ ៕ វណ្ណៈ
