សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្ដរមានជ័យ៖ នៅថ្ងៃទី៦ ខែកញ្ញា ឆ្នាំ២០១៩ មានការបែកធ្លាយមកថា អាជ្ញាធរខេត្តឧត្ដរមានជ័យ និងជំនាញពាក់ពន្ធ័ មានការឃុបឃិតគ្នា លក់ដីរបស់រដ្ឋ ដែលជាគំរោង ផ្សារ សាលារៀន សាខាបក្ស មណ្ឌលសុខភាព បានប្រាក់រាប់លានដុល្លារ ស្ថិតនៅភូមិ ជប់គគីខាងលិច ឃុំអំពិល ស្រុកបន្ទាយអំពិល ខេត្តឧត្ដរមានជ័យ ដែលជាដីគំរោងបម្រុងទុក របស់រដ្ឋដែលរៀបចំដឹងលឺ អាជ្ញាធរគ្រប់លំដាប់ថ្នាក់ និងជំនាញពាក់ពន្ធ័ នៅឆ្នាំ២០១៣ ក្រោមវត្ដមាន លោក ពេជ្រ សុឃិន អតីតអភិបាលនៃគណ:អភិបាលខេត្តឧត្ដរមានជ័យ ។ លោក ហែន បាគង អតីតប្រធានមន្ទីរៀបចំដែនដី លោក ហាំង ម៉េង អភិបាលស្រុក បន្ទាយអំពិល លោក ម៉ៅ មឿន ប្រធានការិយាល័យភូមិបាល ស្រុកបន្ទាយអំពិល និងអតីតមេឃុំអំពិល ។
លោក ឡេង ខ្លី មេភូមិជប់គគីខាងលិច បានបង្ហើបថា ដីគំរោងផ្សារ សាលារៀន សាលាបក្ស និងមណ្ឌលសុខភាព ពិតជាត្រូវបានអ្នកមានអំណាចឃុបឃិតគ្នាលក់ ឲ្យលោកឧកញ៉ា លឹម ហេង ពិតប្រាកដមែន និងអស់រលីងទៅហើយ កាលពីសម័យលោក សរ ថាវី នៅជាអភិបាលនៃគណ:អភិបាលខេត្តឧត្ដរមានជ័យ ។
ពលរដ្ឋសូមអំពាវនាវឲ្យលោក ប៉ែន កុសល្យ អភិបាលខេត្ដឧត្ដរមានជ័យ យកដីគំរោងរបស់រដ្ឋ ខាងលើមករក្សាទុកជាសម្បត្តិរដ្ឋវិញផង ។
លោក វ៉ាត ប៉ារ៉ានីន អភិបាលរង ខេត្តឧត្ដរមានជ័យ ទទួលបន្ទុកដោះស្រាយវិវាទដីធ្លី បានឲ្យដឹងថា លោកមិនដឹងទេ វាជាការគ្របគ្រងកម្រិតស្រុក ព្រោះវានៅក្នុងស្រុក ។
លោក គឹម គាវិន ប្រធានមន្ទីររៀបចំដែនដី ខេត្តឧត្ដរមានជ័យ លោកថា លោកមិនបានដឹងរឿងទាំងអស់ខាងលើនោះទេ ព្រោះលោកមកក្រោយគេ ។
លោក ហាំង ម៉េង អភិបាលស្រុកបន្ទាយអំពិល បានឲ្យដឹងថា ទីតាំងនោះ ជាដីរបស់គណបក្ស សម័យលោក ឆន ជាប្រធានគណៈកម្មការ គាត់ជាអ្នករៀបចំ ៕ ប៉ែន នួន
