សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ជនសង្ស័យម្នាក់ត្រូវបានសមត្ថកិច្ចឃាត់ខ្លួនក្នុងករណីលួចម៉ូតូ និងប្រើប្រាស់សារធាតុញៀនកាលពីវេលាម៉ោង១១យប់ ថ្ងៃទី១០ ខែកញ្ញា ឆ្នាំ២០១៩ ស្ថិតក្នុងចំណុចភូមិព្រៃវល្លិ៍ ឃុំថ្មី ស្រុកកំពង់រោទ៍ ។
យោងតាមសមត្ថកិច្ចនគរបាលស្រុកបានឲ្យដឹងថា ជនសង្ស័យមានឈ្មោះសួស សុវណ្ណវីរះ អាយុ ២១ ឆ្នាំ មុខរបរបុគ្គលិកកាស៊ីណូឡាក់គីរ៉ូប៊ី បច្ចុប្បន្នស្នាក់នៅផ្ទះជួល ភូមិព្រៃវល្លិ៍ ឃុំថ្មី ស្រុកកំពង់រោទ៍ ។ ចំណែកម្ចាស់ម៉ូតូរងគ្រោះមានឈ្មោះរ័ត្ន ស្រីមុំ ភេទស្រី អាយុ ២៨ឆ្នាំ មានទីលំនៅភូមិស្វាយអាណាត ឃុំញរស្រុកកំពង់រោទ៍ ។
ប្រភពបន្តថា នៅវេលាម៉ោង១១យប់ កម្លាំងល្បាតចល័តរបស់អធិការដ្ឋាននគរបាលស្រុកបានចល័តតាមបណ្តោយផ្លូវជាតិ ៣១៤D សហការជាមួយកម្លាំងប៉ុស្តិ៍រដ្ឋបាលថ្មី លុះដល់ចំណុចភូមិព្រៃវល្លិ៍ ឃុំថ្មី ស្រុកកំពង់រោទ៍ ក៏ប្រទះឃើញមុខសញ្ញាសង្ស័យ១នាក់ជិះម៉ូតូម៉ាកនិចពណ៌ខ្មៅឃើញដូចនេះកម្លាំងចល័ត ក៏ឃាត់យកមកសាកសួរនៅប៉ុស្តិ៍នគរបាលរដ្ឋបាលឃុំថ្មី និងបានធ្វើតេស្តទឹកនោមរកសារធាតុញៀនជាលទ្ធផល(+)វិជ្ជមាន ផងដែរ ។
ជនសង្ស័យបានឆ្លើយសារភាពថា ខ្លួនពិតជាបានលួចម៉ូតូរបស់ជនរងគ្រោះប្រាកដមែន និងបានយកលាក់ទុកនៅក្នុងបន្ទប់ជួលផងដែរ ។
បច្ចប្បន្នជនសង្ស័យត្រូវបានសមត្ថកិច្ចកសាងសំណំរឿងទៅស្នងការដ្ឋាននគរបាលខេត្តស្វាយរៀងដើម្បីចាត់ការបន្តតាមច្បាប់ ៕ យឹម សុថាន
