សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ ៖ បើទោះបីជាប្រជាពលរដ្ឋក្នុងសងហគមន៍នេសាទកំពង់ក្រសាំងស្ថិតក្នុងស្រុកបុរីជលសាប្រតិកម្មករណីអាជ្ញាធរមានសមត្ថកិច្ចលក់ទន្លេឲ្យអ្នកនេសាទដាក់ដាយយកត្រីរាប់សិបតោនក្នុងមួយថ្ងៃៗយ៉ាងណាក៏ដោយ ក៏អាជ្ញាធរខេត្តតាកែវនៅតែធ្វើមិនដឹងមិនឮ ពីព្រោះថា ម្នាក់ៗបានទទួលលាភសក្ការពីឈ្មួញវៀតណាមរួចរាល់ទៅហើយ ។ ដូច្នេះ «ស្តោះហើយមិនអាចលេបបានទេ» នេះគឺជាចរិកកូនប្រុស បើទោះបីជាពលរដ្ឋខ្មែរម្ចាស់ស្រុកយំស្រែកយ៉ាងណាក៏ដោយ ។ គេមិនដឹងថា លោកអួច ភា អភិបាលខេត្តតាកែវបានជ្រាបរឿងរាស្ត្រកំពង់ក្រសាំងក្តៅក្រហាយរឿងនេះដែរឬយ៉ាងណានោះទេ ។
ដាយដាក់កាត់ទទឹងទន្លេចំនួន៣កន្លែង នៅឃុំកំពង់ក្រសាំង ស្រុកបូរីជលសារ ខេត្តតាកែវ ត្រូវបានជនជាតិវៀតណាមយកមកដាក់សម្រាប់ចាប់ត្រីគ្រប់ប្រភេទនារដូវបិទការនេសាទឆ្នាំនេះ មិនខ្លាចរអានឹងអាជ្ញាធរ សង្ស័យមានការត្រូវរ៉ូវគ្នាជាមុន។
ដាយទាំងបីកន្លែងដែលដាក់កាត់ទទឹកទន្លេនេះ ប្រជាពលរដ្ឋរស់នៅឃុំកំពង់ក្រសាំង ស្រុកបូរីជលសារបានប្រាប់ថា អភិបាលស្រុក ក៏ដូចជាមេឃុំបានលក់(អតីតដែនឡូត៍លេខ៥) ទៅឲ្យជនជាតិវៀតណាមចូលមកដាក់ប្រមូលយកត្រីគ្រប់ប្រភេទទៅស្រុកគេវិញរាប់សិបតោនជារៀងរាល់ថ្ងៃ។
ក្រុមប្រជាពលរដ្ឋបន្តទៀតថា ពួកគាត់មានការលំបាកណាស់ រាល់ការនេសាទត្រីជាលក្ខណៈគ្រួសារ បើទោះបីជាមានសហគមន៍នេសាទក្នុងឃុំក៏ដោយ ក៏មិនមានប្រយោជន៍ដែរ ព្រោះអាជ្ញាធរស្រុក និងឃុំ បានលក់អតីតឡូត៍នេសាទនេះ ទៅឲ្យជនជាតិវៀតណាមចូលមកដាក់ដាយ និងសៃយ៉ឺនប្រមូលយកត្រីគ្រប់ប្រភេទ ដោយខុសច្បាប់យ៉ាងសេរី។ ពិសេសជារៀងរាល់ឆ្នាំដាយកាត់ទទឹងទន្លេក្នុងឃុំកំពង់ក្រសាំងចំនួន៣កន្លែង គឺគេត្រូវរ៉ូវគ្នាលក់ទៅឲ្យជនជាតិវៀតណាមដាក់តាំងពីរដូវបិទការនេសាទ រហូតដល់រដូវបើកនេសាទ ដោយជ្រកក្រោមស្លាកសហគមន៍នេសាទក្លែងក្លាយតែប៉ុណ្ណោះ។ ក្រុមប្រជាពលរដ្ឋបានបន្ថែមថា ក្នុងឆ្នាំនេះទឹកទន្លេបានឡើងយឺតជាងឆ្នាំមុនៗ គឺទឹកទើបតែហក់ឡើងនៅចុងខែសីហានេះ ហើយដាយកាត់ទទឹងទន្លេទាំង៣ខ្សែនេះជនជាតិវៀតណាមទើបតែចូលមកដាក់ក្នុងខែកញ្ញានេះទេ និងបានប្រមូលយកត្រីទៅស្រុកគេវិញរាប់សិបតោនទាំងថ្ងៃទាំងយប់។
លោក សៅ កុសល ប្រធានរដ្ឋបាលជលផលខេត្តតាកែវ បានប្រាប់តាមទូរស័ព្ទថា ចំពោះដាយកាត់ទទឹងទន្លេទាំង៣ខ្សែនេះ ជារបស់សហគមន៍នេសាទឃុំកំពង់ក្រសាំង និងឲ្យសហគមន៍ជាអ្នកដាក់ខ្លួនគេ តែបើលក់ទៅឲ្យវៀតណាមចូលមកធ្វើនោះ គឺខុសច្បាប់ហើយ។ ចំណែក លោក ទុយ សុភ័ក្រ អភិបាលស្រុកបូរីជលសារ មិនអាចទាក់ទងសុំការបំភ្លឺបានទេ ព្រោះនេះជាទម្លាប់របស់លោកចំពោះអ្នកសារព័ត៌មានទៅហើយ ។
បើតាមមន្ត្រីនៃមន្ទីរកសិកម្មខេត្តតាកែវមួយរូបអះអាងថា ផលប្រយោជន៍ពីការលក់ទន្លេឲ្យជនជាតិវៀតណាមនោះ ត្រូវបានចែករំលែកស្ថាប័នជំនាញគ្រប់សរសៃអស់ហើយ ។ ក្រៅពីនោះនៅមានផែនការជាច្រើនទៀតបានរៀបចំរួចរាល់ក្នុងការលក់ដែននេសាទក្នុងទឹកដីខ្មែរឲ្យជនជាតិវៀតណាមចូលមកនេសាទបន្ថែមទៀតដូចជានៅស្រុកអង្គរបុរីជាដើម ។ ប្រជាពលរដ្ឋនិយាយថា វាជារឿងគួរឲ្យសោកស្តាយ ដែលពលរដ្ឋខ្មែរម្ចាស់ស្រុកមិនត្រូវបានអនុញ្ញាតឲ្យចូលនេសាទ ប៉ុន្តែជនបរទេស(វៀតណាម) ត្រូវបានអនុញ្ញាតឲ្យចូលនេសាទជាចំហរ និងដោយសេរី ។
រាជរដ្ឋាភិបាលកម្ពុជាបានប្រកាសជាញឹកញាប់មិនអនុញ្ញាតឲ្យមានការជួលដីស្រែឲ្យទៅប្រទេសជិតខាងធ្វើនោះឡើយ។ រីឯការលក់ដែននេសាទឲ្យទៅជនជាតិវៀតណាមនេសាទរាល់ថ្ងៃនេះ ក៏មិនខុសពីការជួលដីឲ្យវៀតណាមធ្វើស្រែនោះដែរ ៕
