ប្រជាពលរដ្ឋរិះគន់អ្នកចាក់ដីរំលោភយកដីចំណីព្រែកធ្វើជាកម្មសិទ្ធិផ្ទាល់ខ្លួន

ចែករំលែក៖

ខេត្តស្វាយរៀង ៖ មានករណីចាក់ដីរំលោភយកចំណីព្រែកសាធារណៈធ្វើជាកម្មសិទ្ធិធ្វើឲ្យ មានការរិះគន់យ៉ាងខ្លាំងពីមន្ត្រីរាជការ និងប្រជាពលរដ្ឋដោយចោទថា មានការឃប់ឃិតគ្នាពីអាជ្ញាធរ ជាលក្ខណៈប្រពន្ធ័ ទើបគ្មានស្ថាបន័ណាមើលឃើញខណៈការចាក់ដីលុបព្រែកនេះនៅជាប់ ប៉ុស្តិ៍រដ្ឋបាល ឃុំកំពង់ចក និងនៅជាប់ថ្នល់ជាតិលេខ១៣ គល់ស្ពានកំពង់ចក ជិតសាលាស្រុករំដួល ស្ថិតនៅភូមិចក ឃុំកំពង់ចក ស្រុករំដួល ។

បើតាមសមត្ថកិច្ចបង្ហើបឲ្យដឹងកាលពីព្រឹកថ្ងៃទី១៦ តុលា ២០១៩នេះថា អ្នកចាក់ដីរំលោភយកដីចំណីព្រែកធ្វើជាកម្មសិទ្ធិឈ្មោះ កង ចាន់ ភេទប្រុស អាយុ៦២ឆ្នាំ មុមុខរបរលក់កាហ្វេរ មានទីលំនៅភូមិចក ឃុំកំពង់ចក ស្រុករំដួល ។

ប្រភពដដែលបន្តទៀតថា ការចាក់ដីលុបចំណីព្រែកនេះ គឺអស់រយៈពេល១ខែមកហើយ ប៉ះពាល់ដីព្រែក និងចំណីព្រែកទំហំបណ្តោយ៥២ម៉ែត្រ ទទឹង១៨ម៉ែត្រ ។

ទាក់ទិនករណីចោទប្រកាន់នេះដែរ អ្នកចាក់ដីឈ្មោះ កង ចាន់ ភេទប្រុស អាយុ៦២ឆ្នាំ នៅភូមិកើតហេតុខាងលើបានប្រាប់អ្នកព័ត៌មានឲ្យដឹងថា គាត់ចាក់ដីលើកភូមិសាងសង់ លំនៅឋាននេះ គឺចាក់ដីលើដីចាស់ជាកម្មសិទ្ធិរបស់គាត់ទេ ។

ប្រភពដដែលបន្តទៀតថា ដីដែលចាក់នេះជាដីស្រែគាត់បានមកកាន់កាប់នៅឆ្នាំ១៩៩៣ ដែលមានក្បាលដី៥២ម៉ែត្រ ជម្រៅមិនដឹងប៉ុន្មានទេដោយមិនបានវាស់វែង និងពុំមានបណ្ណ័សម្គាល់សិទ្ធិកាន់កាប់អីទេ ធ្លាប់មានបង្កាន់ដៃទទួលពាក្យកាន់កាប់ដីធ្លីក៏ប៉ន្តែបច្ចុប្បន្នបានបាត់អស់ហើយ ។

ប្រភពដដែលបន្តទៀតថា ដោយភូមិផ្ទះចាស់លិចទឹកទើបចាក់ដីលើដីចាស់ទំហំ៤០ម៉ែត្រ ជម្រៅចាប់ពីចិញ្ចើមថ្នល់ដល់មាត់ព្រែកប្រវែង៤០ម៉ែត្រ គុណនឹង៤០ម៉ែត្រ ដើម្បីឲ្យផុតទឹកនារដូវវស្សា គឺសែងផ្ទះចាស់ទំហំ ៦ម៉ែត្រ គុណនឹង៧ម៉ែត្រ សង់អំពីឈើសរសរបេតុង ជញ្ជាំងក្តារ ប្រក់ក្បឿង មកដាក់លើដីលើកថ្មី និងជួសជុលផ្ទះឲ្យបានល្អរស់នៅ ។

បើតាមមន្ត្រីជំនាញបានឲ្យឹងថា ចំណីថ្នល់ជាតិលេខ១៣នេះ ចំណីផ្លូវ២៥ម៉ែត្រ ហើយបើវាស់ពីអាក់ផ្លូវ២៥ម៉ែត្រ និងវាស់ចេញពីចំណីផ្លូវទៅដល់មាត់ព្រែកប្រវែង២៨ម៉ែត្របើគិតការចាក់ដីនេះផលប៉ះពាល់ដីចំណីផ្លូវ១៥ម៉ែត្រ និងចំណីព្រែក១៨ម៉ែត្រ សរុប៣៣ម៉ែត្រ គុណនឹង៤០ម៉ែត្រ ។ ទាក់ទិនករណីនេះដែរអាជ្ញាធរ ឃុំកំពង់ចកបានឲ្យដឹងថា ខាងឃុំមិនដឹងទេឮថាថ្នាក់លើដោះស្រាយអស់ហើយ ។ លោក សុខា រ៉ាម អភិបាលស្រុករំដួលបានមានប្រសាសន៍តាមទូរសព្ទ័ថា កន្លងមកលោកធ្លាប់បានឲ្យមន្ត្រីជំនាញ ចុះទៅពិនិត្យមើលហើយមន្ត្រីជំនាញរាយការណ៍ថា ម្ចាស់ដីគេចាក់ដីលើដីកម្មសិទ្ធិរបស់គាត់ទេ ទើបលោកមិនមានការហាមឃាត់ឬផ្អាក ។

លោក គឹម សាវុធ ប្រធានមន្ទីរធនធានទឹក និងឧតុនិយមខេត្ត បានមានប្រសាសន៍ថា លោកមិនបានដឹងការចាក់ដីរំលោភយកដីចំណីព្រែកនេះទេ ហើយបើមានការចាក់លុបព្រែកនោះគឺខុសច្បាប់ ហើយលោកនឹងចាត់មន្ត្រីជំនាញចុះទៅពិនិត្យមើល ៕ យឹម សុថាន