សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ កម្លាំងប្រឆាំងបទល្មើសគ្រឿងញៀន នៃអធិការដ្ឋាននគរបាលស្រុកភ្នំក្រវាញ ប៉ុស្តិ៍នគរបាលរដ្ឋបាលលាច សហការចុះបង្រ្កាបមុខសញ្ញាជួញដូរដោយខុសច្បាប់នូវសារធាតុញៀន ក្នុងនោះកម្លាំងឃាត់ជនសង្ស័យពាក់ព័ន្ធ ២នាក់ រួមទាំងវត្ថុតាងផងដែរ ។
ប្រតិបត្តិការខាងលើធ្វើឡើងនៅវេលាម៉ោង១០ និង៣០នាទីព្រឹក ថ្ងៃសុក្រ ២កើត ខែបុស្ស ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២៧ ខែធ្នូ ឆ្នាំ២០១៩ ត្រង់ចំណុចផ្ទះរបស់ឈ្មោះ អែម បូណា ភេទប្រុស អាយុ ៣១ឆ្នាំ ជនជាតិខ្មែរ ស្ថិតក្នុងភូមិប៉ែន ឃុំលាច ស្រុកភ្នំក្រវាញ ខេត្តពោធិ៍សាត់ ។
ប្រភពព័ត៌មានពីកម្លាំងចុះប្រត្តិបត្តិការខាងលើប្រាប់ថា ក្នុងកិច្ចប្រត្តិបត្តិការកម្លាំងឃាត់ខ្លួនមុខសញ្ញាចំនួន ២នាក់ ទី១ ឈ្មោះ អែម បូណា ភេទប្រុស អាយុ ៣១ឆ្នាំ ជនជាតិខ្មែរ(ម្ចាស់ផ្ទះ) បច្ចុប្បន្ន រស់នៅភូមិ.ឃុំខាងលើ និងទី២ ឈ្មោះ នី សុវណ្ណារ៉ា ភេទប្រុស អាយុ ១៦ឆ្នាំ ជនជាតិខ្មែរ បច្ចុប្បន្ន រស់នៅភូមិពេជបាន ឃុំលាច ស្រុកភ្នំក្រវាញ ខេត្តពោធិ៍សាត់ ។
ប្រភពដដែលបន្តទៀតថា ក្នុងនោះកម្លាំងដកហូតវត្ថុតាងរួមមាន៖ ម្សៅក្រាមពណ៌សថ្លាសង្ស័យជាសារធាតុញៀនចំនួន ០៦កញ្ចប់ (ធំចំនួន ០១កញ្ចប់) ស្មើនឹងទម្ងន់ចំនួន ២,៦២ក្រាម ឧបករណ៍ប្រើប្រាស់ក្នុងបុព្វហេតុគ្រឿងញៀនមួយកំប្លេ និងទូរស័ព្ទដៃចំនួន ០៣គ្រឿងផងដែរ ។
ចំពោះករណីខាងលើ៖ ជនសង្ស័យជាមុខសញ្ញា រួមទាំងជនសង្ស័យពាក់ព័ន្ធ នាំ បញ្ជូនយកមកបន្តនីតិវិធីនៅអធិការដ្ឋាននគរបាលស្រុកភ្នំក្រវាញ ដើម្បីបំពេញសំណុំឯកសារពាក់ព័ន្ធបញ្ជូនបន្តទៅការិយាល័យជំនាញ នៃស្នងការដ្ឋាននគរបាលខេត្តពោធិ៍សាត់ចាត់ការបន្ត ៕ បុឹម ពិន
