សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ មន្ត្រីនគរបាលជាច្រើនរូបបានសម្ដែងការមិនពេញចិត្ត នឹងមន្ត្រីនគរបាលមួយរូប មិនដែលមកបំពេញការងារនៅស្នងការដ្ឋាននគរបាលអស់រយៈពេល៥ឆ្នាំមកហើយ ប៉ុន្តែបែរជាមានឱកាសបានឡើងសក្តិ ។ ករណីនេះដែរ មន្ត្រីជាច្រើនបានស្នើសុំឲ្យមានការចុះធ្វើអធិការកិច្ចពីសំណាក់មន្ត្រីអធិការកិច្ចក្រសួងមហាផ្ទៃ ចំពោះមន្ត្រីនគរបាលខេត្តកំពង់ស្ពឺនេះផងដែរ ។
មន្ត្រីដែលត្រូវបានអ្នកដែលសកម្មការងារអះអាងថា មិនដែលមកបំពេញការងារអស់រយៈពេល៥ឆ្នាំហើយនោះ មានឈ្មោះ អ៊ុក ស៊ឺ នាយរងផ្នែកការិយាល័យអន្តោប្រវេសន៍ឋានៈអនុសេនីយ៍ទោ ប៉ុន្តែមន្ត្រីរូបនេះអវត្តមានអស់រយៈពេល៥ឆ្នាំមកហើយ តែអង្គភាពជំនាញឃុបឃិតគ្នាលាក់ទុក ដើម្បីយកប្រាក់ខែចែកគ្នាដោយមានអ្នកចុះហត្ថលេខា (បញ្ជីវត្តមានប្រចាំថ្ងៃ) ជំនួសទៀតផង ។
ប្រភពបានបង្ហើបថា ការធ្វើបែបនេះ ធ្វើឲ្យមន្ត្រីដែលសកម្មការងារមានភាពមិនសប្បាយចិត្ត ហើយបាននិយាយតគ្នាពីមាត់មួយទៅមាត់មួយថា ថ្នាក់លើធ្វើរបៀបនេះ គឺមិនយុត្តិធម៌ និងស្មើភាពគ្នានោះទេ ។ ក្នុងនោះមន្ត្រីជាច្រើនបានសំដែងនូវភាពមិនសប្បាយចិត្ត និងបានរិះគន់ថ្នាក់ដឹកនាំរបស់ខ្លួនចំៗថា ធ្វើការគ្មានតម្លាភាព និងលម្អៀងទៅរកបក្សពួករបស់ខ្លួន ។ ករណីនេះ មន្ត្រីជាច្រើនបានលើកឡើងថា បើសិនជាមានក្រុមអធិការកិច្ចចុះមកធ្វើការស្រាជ្រាវឲ្យបានច្បាស់លាស់នោះ និងរកឃើញភាពមិនប្រក្រតីនេះជាក់ជាមិនខានឡើយ ។
ករណីនេះ បើសិនជារកឃើញហើយថ្នាក់លើគួរណាស់តែចាត់វិធានការតាមផ្លូវច្បាប់ចំពោះមន្ត្រីខិលខូចដែលឃុបឃិតគ្នាកឹបកេងស៊ីលុយរបស់រដ្ឋអស់រយៈពេលច្រើនឆ្នាំមកហើយ នេះកុំលើកលែងឲ្យសោះ ។
ពាក់ព័ន្ធមន្ត្រីប៉ូលីសដែលមិនទៅធ្វើការហើយបានឡើងសក្តិនេះដែរ លោកប្រធានការិយាល័យបុគ្គលិក លោក ទឹម តាត បានប្រាប់ថា មិនមានឈ្មោះនេះនៅក្នុងអង្គភាពស្នងការដ្ឋាននគរបាលខេត្តកំពង់ស្ពឺនោះទេ ។ ដោយឡែកលោក ឈួន យឿង ប្រធានការិយាល័យគ្រប់គ្រងជនបរទេសបានទទួលស្គាល់ថា លោក អ៊ុក ស៊ឺ ពិតជានាយរងផ្នែកការិយាល័យអន្តោប្រវេសន៍ពិតប្រាកដមែន ។
លោកសុំនិយាយត្រឹមប៉ុណ្ណឹងចុះលើសពីនេះទៀតលោកមិនហ៊ាននិយាយនោះទេ ព្រោះលោកឋានៈតូចជាងគេ ។
មានការលើកឡើងផងដែរថា បើប្រធានការិយាល័យបុគ្គលិកបដិសេធថាមិនមានឈ្មោះ អ៊ុក ស៊ឺ មន្ត្រីនៃស្នងការដ្ឋាននគរបាលខេត្តកំពង់ស្ពឺទេ ចុះនរណាជាអ្នកចុះហត្ថលេខាប្រចាំថ្ងៃ ហើយនរណាជាអ្នកបើកប្រាក់បៀវត្សរបស់គាត់យក?
បើតាមប្រភពមន្ត្រីតូចតាចនិយាយក្នុងលក្ខខណ្ឌសុំមិនបញ្ចេញឈ្មោះបានបង្ហើបថា ករណីនេះមានច្រើនណាស់ ហើយថ្នាក់ក្រោមពិតជាមិនហ៊ាននិយាយនោះទេ តែបើរឿងនេះបានបែកធ្លាយដល់ប៉ុណ្ណឹងទៅហើយ គួរណាស់តែអស់លោកដែលជាមន្ត្រីជាន់ខ្ពស់ធ្វើការពន្យល់បកស្រាយឲ្យបានក្បោះក្បាយជាងនេះទើបសម ។
ករណីនេះមន្ត្រីតូចតាចសង្ឃឹមថា ថ្នាក់ដឹកនាំក្រសួងមហាផ្ទៃ ជាពិសេសឯកឧត្តមនាយឧត្តមសេនីយ៍អគ្គស្នងការនគរបាលជាតិ និងចាត់ក្រុមមន្ត្រីអធិការកិច្ចធ្វើការស្រាវជ្រាវចំពោះករណីឈ្មោះអ៊ុក ស៊ឺ នេះផង ខណៈដែលគាត់មិនបានមកធ្វើការច្រើនឆ្នាំហើយហើយ បែរជាបានឡើងសក្តិទៀតផង ៕ សេនាស័ក្តិ
