សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ ពិតជាអកុសលនិងវាសនាមិនទៀងមែន សូម្បីតែដើរទៅបន្ទោរបង់លាមកលើទំនប់ប្រឡាយក៏រអឹលជើងធ្លាក់ទឹកស្លាប់យ៉ាងអាណោចអាធ័ម ដោយគ្មានអ្នកណាដឹងជួយទាន់ឡើយ ។
ជាក់ស្តែងនៅវេលាម៉ោង ៦និង៣០នាទីព្រឹក ថ្ងៃទី៣១ ខែមករា ឆ្នាំ២០២០ មានករណីមនុស្សម្នាក់បានលង់ទឹកស្លាប់ស្ថិតនៅចំណុចទំនប់ទឹកបុស្សម្កាក់ ភូមិអូររំដេង ឃុំត្រពាំងឬស្សី ស្រុកកំពង់ស្វាយ។
មន្រ្តីនគរបាលស្រុកកំពង់ស្វាយបានឲ្យដឹងថា ជនរងគ្រោះឈ្មោះ តឹក យ៉ាន់ ភេទប្រុស អាយុ ៣៤ឆ្នាំ មុខរបរ កសិករ មានទីលំនៅកន្លែងកើតហេតុខាងលើ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុជនរងគ្រោះឈឺពោះបត់ជើងក៏ដើរ តាមទំនប់បុស្សម្កាក់រកកន្លែងបត់ជើងធំតាមសម្រួល ប៉ុន្តែចៃដន្យអាក្រក់បានរអិលជើងធ្លាក់ទឹកប្រឡាយបណ្តាលឲ្យលង់ទឹកស្លាប់ដោយគ្មានអ្នកណាដឹងជួយស្រង់ទាន់ឡើយ ។
ក្រោយពេលកើតហេតុសមត្ថកិច្ចជំនាញបាន ចុះទៅដល់ធ្វើកោសល្យវិច័យរួចសន្និដ្ឋានថា ជនរងគ្រោះពិតជាស្លាប់ដោយលង់ទឹកប្រាកដ ប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕ ប្រាថ្នា
