សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យមានគ្នាចំនួន៣នាក់ ដែលជាមុខសញ្ញាចាស់ ធ្លាប់លួចម៉ូតូយ៉ាងសកម្មត្រូវបានប្រជាពលរដ្ឋចាប់បានម្នាក់ ដោយឡែក២នាក់ទៀតគេចខ្លួនបាត់ ខណៈចូលមកលួចម៉ូតូកាលពីយប់ថ្ងៃទី១០ ខែកុម្ភៈ ឆ្នាំ២០២០ នៅបន្ទប់ជួលមួយកន្លែង ភូមិតាងួន១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបញ្ជាក់ថា ជនសង្ស័យ ឈ្មោះ បែន សុបុត្រា ភេទប្រុស អាយុ៣៧ឆ្នាំមុខរបរមិនពិតប្រាកដ ស្នាក់នៅ ភូមិតាងួនទី១ សង្កាត់កាកាបទី១ ខណ្ឌពោធិ៍សែនជ័យ (ឃាត់ខ្លួន) ។ ឈ្មោះ ប្រុស ភេទប្រុស អាយុប្រហែល២៧ឆ្នាំ មុខរបរមិនពិតប្រាកដស្នាក់នៅ ភូមិតាងួនទី១ សង្កាត់កាកាបទី១ ខណ្ឌពោធិ៍សែនជ័យ (គេចខ្លួន) ។ ឈ្មោះ ណែត ភេទប្រុស អាយុប្រហែល២៥ឆ្នាំ មុខរបរមិនពិតប្រាកដ ស្នាក់នៅ ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ (គេចខ្លួន) ។
ចំណែកជនរងគ្រោះ ឈ្មោះ ហ៊ន ស្រីញ៉ិច ភេទស្រី អាយុ ២១ឆ្នាំ មុខរបរកម្មការិនី ស្នាក់នៅ ភូមិតាងួនទី១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។ ឈ្មោះ ខ្នា រ៉ូម៉ា ភេទស្រី អាយុ២១ឆ្នាំមុខរបរ និស្សិត ស្នាក់នៅ ភូមិតាងួនទី២ សង្កាត់កាកាបទី១ ខណ្ឌពោធិ៍សែនជ័យ ។
សម្ភារៈបាត់បង់ ៖ ម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅ ស៊េរី២០១៩ ពាក់ស្លាកលេខ ភ្នំពេញ 1HI 5006 (របស់ជនរងគ្រោះ ហ៊ន ស្រីញ៉ិច) ។ ម៉ូតូមួយគ្រឿងទៀតម៉ាក ហុងដា វ៉េវ ពណ៌ខ្មៅ ស៊េរី ២០១០ ពាក់ស្លាកលេខ កំពង់ធំ 1M6067 (របស់ជនរងគ្រោះ ខ្នា រ៉ូម៉ា) ។
តាមសាក្សីនៅកន្លែងកើតហេតុបានឲ្យដឹងថា កន្លងមកជនសង្ស័យខាងលើធ្លាប់បានមកធ្វើសកម្មភាពលួចយកម៉ូតូនៅចំណុចកើតហេតុអស់ចំនួន២គ្រឿងមកហើយ ។ ដោយសារជនរងគ្រោះឆែកមើលក្នុងកាមេរ៉ាសុវត្ថិភាព ទើបចំណាំមុខលុះមកដល់វេលាកើតហេតុ ឃើញជនសង្ស័យខាងលើមកម្តងទៀត ទើបឃាត់ប្រគល់ជូននគរបាលតែម្តង ។
បច្ចុប្បន្នជនសង្ស័យកំពុងឃុំខ្លួនបណ្ដោះអាសន្ននៅអធិការ ខណ្ឌដើម្បីកសាងសំណុំរឿងបញ្ជូនទៅកាន់តុលាការចាត់ការតាមផ្លូវច្បាប់៕ សុខាសែនជ័យ
