សារព័ត៌មាន នគរវត្ត តែងតែនាំមុខគេជានិច្ច
ក្រុងប៉ោយប៉ែត៖ គ្រឿងក្នុងជ្រូក និង ក្រចកជើង ខូចគុណភាព ចំនួន១២កេះ បម្រុងលួចដឹកតាមរថយន្តក្រុងនៅពេលយប់ ទៅចែកចាយតាមបណ្ដាខេត្ត ត្រូវបានមន្ត្រីជំនាញ បសុព្យាបាល (ពេទ្យសត្វខេត្ត) បង្រ្កាបកាលពីម៉ោងវេលា០៤និង៤០នាទីរសៀល ថ្ងៃទី២១ ខែកុម្ភៈ ឆ្នាំ២០២០ ស្ថិតក្នុងភូមិក្បាលស្ពាន១ សង្កាតប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ក្នុងប្រតិបត្តិការនោះ ដឹកនាំដោយលោក ហ៊ុយ ទូច ប្រធានការិយាល័យ បសុព្យាបាលខេត្ត និង មានការសម្របសម្រួលពីលោក តេង សាម៉ៃ ព្រះរាជអាជ្ញារង អមសាលាដំបូងខេត្ត បានដឹកនាំកម្លាំងជំនាញ ធ្វើការបង្រ្កាប នៅទីតាំងខាងលើ ។
លោកហ៊ុយ ទូច ប្រធានពេទ្យសត្វខេត្ត ប្រាប់ឲ្យដឹងថា មន្ត្រីជំនាញចុះមកទីតាំងខាងលើនេះ ក្នុងនាមលោក ជាមន្ត្រីយុត្តិធម៌ បសុព្យាបាលខេត្ត ត្រូវបំពេញតួនាទី បង្រ្កាបរាល់សាច់សត្វ និង ផលិតផលដែលចេញពីសាច់សត្វ និង បន្លែ ដែលមានសារធាតុគីមីមិនមានការវេចខ្ចប់ឲ្យបានត្រឹមត្រូវ របស់ក្រុមឈ្មួញ ដែលតែងតែបង្កប់ក្នុងរទេះ ដឹកចេញពីប្រទេថៃចូលមកកម្ពុជានិង ដឹកបន្តតាមរថយន្តខាងលើនេះ ទៅចែកចាយតាមបណ្តាខេត្ត ផ្សេងៗ ដោយគ្មានច្បាប់ អនុញ្ញាតិ ពីមន្ត្រីជំនាញណាមួយនោះឡើយ។
លោកបានបន្តទៀតថា៖ ប្រសាសន៍របស់ប្រមុខរាជរដ្ឋាភិបាល ដែលមានសម្តេច តេជោ ជាប្រមុខថ្នាក់ដឹកនាំ លោកតែងតែយកចិត្តទុកដាក់ ក្នុងសុខាមាលភាព ប្រជាពលរដ្ឋ និង បានឲ្យមន្ត្រីជំនាញ ខិតខំទប់ស្កាត់ រាល់ទំនិញ និង ផលិតផលណា ដែលធ្វើឲ្យប៉ះពាល់ ដល់សុខភាព ពលរដ្ឋ និងមិនឲ្យមានតទៅទៀតនោះឡើយ។
មហាជនបានធ្វើការរិះគន់ផងដែរថា៖ ចំពោះកន្លែងទីតាំងរថយន្តក្រុងមួយចំនួនតែងតែប្រើរួបភាពផ្សេងដឹកបង្កប ទំនិញបង់ពន្ធមិនគ្រប់ដែលធ្វើឲ្យមានការខាតបង់ចំណូលពន្ធរដ្ឋ រួមទាំងអនុវត្តផ្ទុយពីក្រសួងដែលចេញអាជ្ញាប័ណ្ណគួរតែ មន្ត្រីជំនាញ ចុះអនុវត្តច្បាប់រាល់រថយន្តក្រុងនៅតាមបណ្ដាចំណត់ ហើយរថយន្តទាំងនោះកន្លងមកដឹកស្ទើតែរៀងរាល់ថ្ងៃ យកទៅចែកចាយ នៅតាមបណ្តាខេត្ត ដោយមិនគិតពីសុខភាព របស់បងប្អូនប្រជាពលរដ្ឋ ដែលទទួលរងគ្រោះអស់មិនតិចនាក់នោះដែរ ។ ចំពោះការចុះបង្រ្កាប របស់មន្ត្រីជំនាញ ខាងអង្គភាពយើង នៅមិនទាន់ដឹងថា មានចំនួនសរុបប៉ុន្មានគីឡូក្រាមនោះឡើយ ៕ វណ្ណា
