សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ នគរបាលបាន ឃាត់ខ្លួនជនសង្ស័យចំនួន២នាក់ ដែលបម្រុងធ្វើសកម្មភាព លួចកាច់បំបែកសោ កម៉ូតូ កាលពីវេលាម៉ោង3.00នាទីទៀបភ្លឺ ថ្ងៃទី២៤ ខែកុម្ភៈ ឆ្នាំ២០២០ នៅចំណុចផ្លូវចូលភ្នំខៀវ ស្ថិតនៅភូមិ២ សង្កាត់២ ក្រុង-ខេត្តព្រះសីហនុ ។
សមត្ថកិច្ចបានបញ្ជាក់ថា ជនសង្ស័យ ឈ្មោះ អាយ អ៊ឹន ភេទប្រុស អាយុ៤០ឆ្នាំ មុខរបរ មិនពិតប្រាកដមានទីលំនៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ និងឈ្មោះ ភឹម ហាច ភេទប្រុស អាយុ ៣៦ឆ្នាំ មុខរបរ មិនពិតប្រាកដ មានទីលំនៅ ភូមិ៣ សង្កាត់១ ក្រុង-ខេត្តព្រះសីហនុ ។
ជាមួយការឃាត់ខ្លួននេះផងដែរ សមត្ថកិច្ចបានចាប់យកវត្ថុតាង ៖ ម៉ូតូ១គ្រឿង ម៉ាកហុងដាសេ១២៥ ឆ្នាំ២០១៥ បិទតែមឆ្នាំ២០១៦ ពណ៌ខ្មៅ ពាក់ស្លាកលេខ ពោធិ៍សាត់ 1G-0693 (ស្លាកលេខក្លែងក្លាយ), សោច្នៃសម្រាប់កាច់បំបែកសោ កម៉ូតូចំនួន៤ដើម, សោស្រាប់តភ្ជាប់ សោច្នៃកាច់បំបែកសោកម៉ូតូ១ដើម, ទុយណឺវិស ១ដើម, ដែកអក្សរ V ១ដើម (សម្រាប់ឆ្កឹះមេសោរ), សោរថយន្ត១, ទូរស័ព្ទដៃ៤គ្រឿង (ម៉ាក OPPO ២គ្រឿង និងម៉ាក NOKIA អិនចុចពិល ២គ្រឿង), មួកកាតិប ២, ម៉ាស ២ និងប្រាក់រៀលមួយចំនួន។
សមត្ថកិច្ចបានបញ្ជាក់ថា ករណីនេះ ការិយាល័យនគរបាលព្រហ្មទណ្ឌកម្រិតស្រាល កំពុងបន្តតាមនីតិវិធី ៕ ឆ្លាម សមុទ្រ
