សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ដោយបង្ហាញពីការមិនពេញចិត្ត នឹងកិច្ចព្រមព្រៀងដែលចុះហត្ថលេខាជាមួយរុស្ស៊ី និងអាស៊ែបៃហ្សង់បញ្ចប់ជម្លោះក្នុងតំបន់Nagorno-Karabakh បានធ្វើឲ្យរដ្ឋមន្ត្រីការបរទេសអាមេនី លោកZohrab Mnatsakanyan នៅថ្ងៃទី១៦ ខែវិច្ឆិកា ឆ្នាំ២០២០ម្សិលមិញនេះសម្រេចលាលែងចេញពីតំណែង ។ ប៉ុន្តែទឹកដីក្នុងតំបន់នេះមួយចំនួនដែលធ្លាប់គ្រប់គ្រងដោយក្រុមឧទ្ទាមផ្ដាច់ខ្លួនអាមេនី ទៅឲ្យរដ្ឋាភិបាលអាស៊ែបៃហ្សង់។
ជាក់ស្តែងការចុះចេញពីតំណែងរបស់រដ្ឋមន្ត្រីការបរទេសអាមេនី លោកZohrab Mnatsakanyan ប៉ុន្មានថ្ងៃក្រោយអាមេនី ចុះហត្ថលេខាកិច្ចព្រមព្រៀងឈប់បាញ់ជាមួយអាស៊ែបៃហ្សង់ក្រោមការជ្រោមជ្រែងរបស់របស់រុស្ស៊ី។ ចំណែកកិច្ចព្រមព្រៀងនេះ ត្រូវបានមើលឃើញថាជាបរាជ័យសម្រាប់អាមេនី ព្រោះទឹកដីខ្លះដែលក្រុមឧទ្ទាមដែលខ្លួនគាំទ្រនៅ Nagorno-Karabakh ត្រូវប្រគល់ឲ្យអាស៊ែបៃហ្សង់។
បើតាមទីភ្នាក់ងារព័ត៌មានReuters ចុះផ្សាយថា អ្នកនាំពាក្យរដ្ឋមន្ត្រីការបរទេសអាមេនី អះអាងថា ការបោះបង់ក្រុង Shusha ដែលជាក្រុងសំខាន់ទី២ ក្នុងតំបន់ Nagorno-Karabakh ពុំដែលស្ថិតក្នុងរបៀបវារៈណាមួយនៃការចចារសន្តិភាពជាមួយអាស៊ែបៃហ្សង់ឡើយ។ ជាក់ស្តែងមិនមានមូលហេតុបញ្ជាក់ពីការលាលែងនេះឡើយ ប៉ុន្តែអាចទាក់ទិននឹងកិច្ចព្រមព្រៀងឈប់បាញ់ និងការប្រគល់ទីក្រុងឲ្យអាស៊ែបៃហ្សង់។
ដោយឡែករដ្ឋាភិបាលលោកនាយករដ្ឋមន្ត្រី Nikol Pashinyan ក្រោយចុះកិច្ចព្រមព្រៀងខាងលើ ក៏រងការទិតៀនពីសំណាក់សាធារណមតិក្នុងស្រុកដោយបាតុកររាប់ពាន់នាក់ធ្វើបាតុកម្មទាមទារឲ្យលោកPashinyan ចុះចេញពីតំណែង។ ដូចគ្នានេះដែរ ប្រធានាធិបតីអាមេនីលោកArmen Sarkissian បាននិយាយថារដ្ឋាភិបាលរបស់លោកPashinyan គួរណាស់តែត្រូវរំលាយចោល ដើម្បីបើកផ្លូវឲ្យមានការបោះឆ្នោតសភាមុនអាណត្តិ។
គួររម្លឹកថា កាលពីថ្ងៃទី១០ វិច្ឆិកា អាមេនី អាស៊ែបៃហ្សង់ និងរុស្ស៊ី បានចុះកិច្ចព្រមព្រៀងសន្តិភាពមួយសម្រាប់តំបន់ Nagorno-Karabakh។កិច្ចព្រមព្រៀងនោះ អនុញ្ញាតឲ្យអាស៊ែបៃហ្សង់កាន់កាប់ទឹកដីដែលខ្លួនវាយយកបានក្នុងតំបន់ជម្លោះ។ រុស្ស៊ី បានពង្រាយកងរក្សាសន្តិភាព២ពាន់នាក់ដើម្បីឃ្លាំមើលបទឈប់បាញ់ខាងលើ។ តំបន់ Nagorno-Karabakh ទទួលស្គាល់ជាអន្តរជាតិជាទឹកដីរបស់អាស៊ែបៃហ្សង់ ប៉ុន្តែគ្រប់គ្រងដោយជនជាតិភាគតិចអាមេនីតាំងតែពីឆ្នាំ១៩៩៤។
ជុំវិញបញ្ហាខាងលើនេះ នាយករដ្ឋមន្ត្រី Pashinyn បានច្រានចោល ការទាមទារឲ្យចុះចេញពីតំណែងដែរ។ លោក Pashinyan ថែមទាំងបានលើកឡើងថា សង្គ្រាមជាមួយអាស៊ែបៃហ្សង់អាចនឹងត្រូវបានបញ្ចៀសបើសិនជាពេលនោះអាមេនីស្ម័គ្រចិត្តបោះបង់តំបន់ចំនួន៧ជុំវិញទឹកដីNagorno-Karabakh នឹងទីក្រុងShushi។ ប៉ុន្តែលោកថា អាមេនីសុខចិត្តធ្វើសង្គ្រាម៕
ដោយ៖ស តារា
