សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សូមចូលរួមដោយក្តីរំភើបរីករាយណាស់! ថ្ងៃនេះ អូនតូចបានចេញទៅផ្ទះវិញហើយ 👨⚕️ជាសះស្បើយ។
(ប្រភពពីលោក មករា, TYDA – គ្រូពេទ្យស្ម័គ្រចិត្តយុវជនសម្តេចតេជោ) ។
សូមរំឮកថា, ក្នុងករណី(អូនតូចម្នាក់នេះ)មានវិជ្ជមានកូវីដ-១៩ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល កាលពី ១០ថ្ងៃមុន លោកស្រីបានសំណេរដោយក្តីរន្ធត់អាណិតក្រៃលែង ចំពោះក្មេងតូចៗ ដែលត្រូវបានឆ្លងកូវីដ-១៩ គ្មានត្រាប្រណីពីជំងឺដ៏កាចសាហាវមួយនេះ។
លោកស្រីវេជ្ជបណ្ឌិតបានលើកឡើងថា, រន្ធត់ចិត្តពិត អាណិតរាស្ត្រខ្មែរ មិនគួរណាប្រែជាមានការភ័យ ដោយសារវីរុសកូវីដ-១៩ចង្រៃ មិនត្រាប្រណីសូម្បីកុមារតូច។ យេីងអាចឈ្នះបាន ដោយការប្រណិបត្តិ តាមវិធានការពិតរបស់សម្តេចតេជោ ហ៊ុន សែន ប្រមុខដឹកនាំឈ្លៀសវៃមែនទែន នាំរាស្ត្រខ្មែរនឹងបាន ស្រាកស្រាន្តទុក្ទភ័យ កូវីដចង្រៃ សូមរលាយសូន្យ៖
ឥឡូវនេះ វីរុសកូវីដ-១៩ កំពុងតែសកម្ម និងសប្បាយចិត្តក្នុងការងាករកកន្លែងដែលងាយស្រួលវាយលុកបាន នៅតាមទីតាំងប្រមូលផ្តុំមនុស្សច្រេីនដូចជាទីផ្សារ កាស៊ីណូ និងរោងចក្រ ដែលសុទ្ធសឹងតែជាកន្លែងដែលមានមនុស្សម្នាច្រេីន។ ពេលបុគ្គលបានឆ្លងវីរុសកូវីដ-១៩ នៅតាមទីតាំងទាំងនេះ ហេីយមកដល់ផ្ទះ អាចមានការចម្លងបន្តមកដល់ក្រុមគ្រួសារខ្លួន សូម្បីតែកូនតូចៗមិនថាអាយុតិច ឫច្រេីននោះឡេីយ។ ដូច្នេះ ប្រសិនបេីបងប្អូនមិនបន្តការយកចិត្តទុកដាក់អនុវត្តហ្មត់ចត់វិធានការ “៣ការពារ និង ៣កុំ និងចាក់វ៉ាក់សាំង+នៅផ្ទះជាបណ្តោះអាសន្ន” នោះទេ អាយុជីវិតបុគ្គលណាម្នាក់ ឫអាចមានច្រេីននាក់ នឹងត្រូវឆក់យកដោយសារតែជំងឺកូវីដ-១៩ ដោយងាយស្រួលហេីយ។ ត្រូវចងចាំថា “ពេលនេះ សុខភាព និងអាយុជីវិតរបស់បុគ្គល និងក្រុមគ្រួសារខ្លួន គឺពឹងផ្អែកលេីការសម្រេចចិត្តដ៏ត្រឹមត្រូវរបស់ខ្លួនឯងហេីយ បេីមិនចង់មានជំងឺកូវីដ-១៩ ទេនោះ គឺត្រូវខិតខំ អត់ធ្មត់ទ្រាំការលំបាកក្នុងរយ:ពេលខ្លី ជាជាងរងនូវការលំបាកក្នុងរយ:ពេលយូរ ដោយអនុវត្តវិធានការដែល សម្តេចតេជោនាយករដ្ឋមន្ត្រី បានដាក់ចេញជាបន្តបន្ទាប់នេះ ជាជាងការធ្វេីដំណេីរឆ្ពោះទៅរកជ្រោះមរណ:កូវីដ-១៩ ដោយសារតែការធ្វេសប្រហែស ការផ្គេីន ឫមិនព្រមអនុវត្តតាមវិធានការដែលបានដាក់ចេញនានានេះ” ។ កាលសង្រ្គាម យេីងខ្លាចត្រូវគ្រាប់ផ្លោង នាំគ្នាជ្រកកោនក្នុងត្រង់សេ តែពេលនេះ យេីងខ្លាចវីរុសកូវីដ-១៩ ផ្លោងដាក់យេីង យេីងត្រូវនាំគ្នានៅផ្ទះ ដែលការនៅផ្ទះរបស់យេីង វាងាយស្រួលជាងការជ្រកក្នុងត្រង់សេឆ្ងាយណាស់ ហេីយសត្រូវអត់ស្រមោលកូវីដ-១៩ ពិតជាមានការលំបាកក្នុងការស្វែងរកការវាយលុក ហេីយរកយេីងមិនឃេីញទៀតផង។ សូមជូនពរបងប្អូនប្រជាពលរដ្ឋទាំងអស់ សូមរួមគ្នារក្សាឱ្យមានសុខភាពល្អ ចៀសផុតពីការវាយលុកជំងឺកូវីដ-១៩ និងសូមឱ្យបានឆ្លងផុតពីគ្រោះឆ្លងវីរុសកូវីដ-១៩ ទាំងអស់គ្នា។
សូមអរគុណ
បំណងល្អពីលោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ ជាប្រធាន គ.វ.ក-១៩ និងជាអ្នកនាំពាក្យក្រសួងសុខាភិបាលកម្ពុជា។
សូមបញ្ជាក់ផងដែរថា, លោកស្រី ពេជ ចន្ទមុន្នី ក៏បានបង្ហោះសារលើហ្វេសប៊ុកទាំងយប់ ដែលមានពលរដ្ឋខ្មែរចំនួន ៨៣៤ នាក់ នៅសម្រាកព្យាបាលកោះពេជ្រ បានជាសះស្បើយ ។ លោកស្រីផ្ដើមនូវក្តីសង្ឃឹមយ៉ាងខ្លាំង ថាកម្ពុជានឹងរួចផុតពីជំងឺដ៏កាចសាហាវមួយនេះក្នុងពេលដ៏ខ្លីខាងមុខ៕
ដោយ ៖ សុខ ខេមរា
