សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោកតាអាយុ៧៧ឆ្នាំម្នាក់បានរងរបួសដោយសារករណីគ្រោះថ្នាក់ចរាចរណ៍ដោយត្រូវរថយន្តម៉ាកស្តារិចបើកបុកម៉ូតូពីក្រោយយ៉ាងពេញទំហឹងហើយបន្តបើកគេចដល់ពាក់កណ្ដាលផ្លូវត្រូវសមត្ថកិច្ចរាយការណ៍តាមវិទ្យុទាក់ទងស្ទាក់ចាប់បានក្នុងឃុំពងទឹកស្រុករំដួល។
ហេតុការណ៍នេះបានកើតឡើងកាលពីវេលាម៉ោង១០ព្រឹក ថ្ងៃទី១៣ខែមិថុនាឆ្នាំ២០២១ ស្ថិតនៅលើផ្លូវជាតិលេខ ១៣នៅត្រង់ចំណុចភូមិត្រពាំងដំរី ឃុំកំពង់អំពិល ស្រុករំដួល ខេត្តស្វាយរៀង។
សមត្ថកិច្ចនគរបាលស្រុកបានឲ្យដឹងថាលោកតារងគ្រោះមានឈ្មោះ អ៊ុក រ៉ែម អាយុ ៧៧ឆ្នាំ មុខរបរកសិកររស់នៅភូមិថ្នា ឃុំថ្នាធ្នង់ ស្រុករំដួលខេត្តស្វាយរៀង ខណៈបើកម៉ូតូម៉ាកហុងដាគុប៧០មូល ពណ៌សំបកឪឡឹកគ្មានស្លាកលេខខូចខាតទាំងស្រុង។
ចំណែកអ្នកបើករថយន្តបង្កហេតុមានឈ្មោះ វង រ៉ាយ៉ា អាយុ ២៩ ឆ្នាំ មុខរបរ បើកបររស់នៅភូមិព្រៃស្ទៀង ឃុំស្វាយតាយាន ស្រុក កំពង់រោទិ៍ ខេត្ត ស្វាយរៀង។
តាមសាក្សីបានឱ្យដឹងថាមុនកើតហេតុមានបុរសចំណាស់ម្នាក់បានជិះម៉ូតូមួយគ្រឿងម៉ាកហុងដាគុប៧០មូល ពណ៌សំបកឪឡឹកគ្មានស្លាកលេខក្នុងទិសដៅ ពីជើងទៅត្បូងខណៈនោះស្រាប់តែមានរថយន្តម៉ាកស្តារិច ពណ៌ស ពាក់ស្លាកលេខភ្នំពេញ២BE.៩០៥៥ប្រើប្រាស់ល្បឿនលឿនក្នុងទិសដៅស្របគ្នាបានបុកម៉ូតូពីក្រោយយ៉ាងពេញទំហឹងបង្កការភ្ញាក់ផ្អើល។
ក្រោយពីឃើញសភាពការណ៍មិនស្រួលក៏បន្តបើកគេចដល់ពាក់កណ្ដាលផ្លូវត្រូវសមត្ថកិច្ចរាយការណ៍តាមវិទ្យុទាក់ទងស្ទាក់ចាប់បាននៅក្នុងឃុំពងទឹកស្រុករំដួលផងដែរ។
លោកតារងគ្រោះត្រូវបានសមត្ថកិច្ចបញ្ជូនទៅសម្រាកព្យាបាលនៅមន្ទីពេទ្យខេត្តស្វាយរៀងចំណែកម៉ូតូអូសយកមករក្សានៅប៉ុស្តិ៍រដ្ឋបាលកំពង់អំពិលដោយឡែក រថយន្តយកមករក្សាទុកនៅអធិការដ្ឋាននគរបាលស្រុករំដួលដើម្បីដោះស្រាយពេលក្រោយតាមច្បាប់៕
ដោយ៖ យឹម សុថាន
