សារព័ត៌មាន នគរវត្ត តែងតែនាំមុខគេជានិច្ច
ការប្រកួតជុំចុងក្រោយក្នុងពូល G នៅរាត្រីនេះមានការប្រជែងគ្នារវាងក្រុមដែលឈរលេខ២ និងក្រុមដែលឈរលេខ៣ក្នុងពូល។ ក្នុងនោះក្រុមជម្រើសជាតិស៊្វីសត្រូវប៉ះក្រុមជម្រើសជាតិស៊ែប៊ី ដើម្បីប្រជែងគ្នាកក់កៅអីវគ្គ១៦ក្រុមចុងក្រោយនៃព្រឹត្តិការណ៍ World Cup 2022 នៅតាកា។
ការប្រកួតកន្លងមក ក្រុមស្វ៊ីសបានឈ្នះកាមេរូនក្នុងការប្រកួតបើកឆាកក្នុងពូល ហើយបានបរាជ័យវិញក្រោមថ្វីជើងប្រេស៊ីល១ទល់០ ដោយបន្តឈរលេខ២មាន៣ពិន្ទុក្នុង២ប្រកួត (ឈ្នះ១ ចាញ់១)។ ចំណែកក្រុមស៊ែប៊ីវិញមិនទាន់ឈ្នះម្តងនោះទេ ដោយប្រកួតលើកដំបូងចាញ់ប្រេស៊ីល២ទល់០ និងបន្ទាប់មកស្មើជាមួយកាមេរូន៣ទល់៣ កំពុងឈរលេខ៣មាន១ពិន្ទុ។
ការជួបគ្នា១ប្រកួតកន្លងមក ក្រុមស្វ៊ីសបានយកឈ្នះស៊ែប៊ីក្នុងលទ្ធផល២ទល់១ ក្នុងការប្រកួតជម្រុះ World Cup កាលពីខែមិថុនា ឆ្នាំ២០១៨កន្លងទៅ។ ការប៉ះគ្នាយប់នេះក្រុមស្វ៊ីសចាំបាច់ត្រូវការឈ្នះដើម្បីកក់កៅអីទៅកាន់វគ្គ១៦ក្រុម ប៉ុន្តែសិនជាស្មើគ្នា គេចាំអ៊ុតមើលការប្រកួតរវាងប្រេស៊ីលនឹងកាមេរូនដែរ បើសិនជាកាមេរូនឈ្នះប្រេស៊ីលនោះគឺកាមេរូននឹងឡើង។ ចំណែកស៊ែប៊ីវិញក៏ត្រូវការឈ្នះដែរ ដើម្បីមានឱកាសឡើងទៅកាន់វគ្គ១៦ក្រុម។
ចំណែកប្រេស៊ីលដែលត្រូវប៉ះកាមេរូននៅរាត្រីនេះដែរគឺមានកៅអីគ្រប់គ្រាន់ដើម្បីឡើងទៅវគ្គ១៦ក្រុមរួចទៅហើយ ដោយ២ប្រកួតកន្លងមកប្រេស៊ីលឈ្នះទាំង២ប្រកួតមាន៦ពិន្ទុនៅក្នុងដៃ។ ការប្រកួតនេះកាមេរូនត្រូវតែខិតខំ បើទោះបីលទ្ធភាពឈ្នះប្រេស៊ីលមានតិចក៏ដោយក៏ត្រូវតែបង្កើតឱកាសដើម្បីប្រជែងកៅអី១៦ក្រុមក្នុងពូលនេះដែរ។
ការប៉ះគ្នា៥ដងរវាងប្រេស៊ីលនឹងកាមេរូនគឺប្រេស៊ីលឈ្នះ៤ដង រីឯកាមេរូនឈ្នះតែម្តងគត់។ ប្រកួតលើកចុងក្រោយប្រេស៊ីលបានយកឈ្នះ១ទល់០ក្នុងជំនួបមិត្តភាពអន្តរជាតិកាលពីខែវិច្ឆិកា ឆ្នាំ២០១៨កន្លងទៅ។
សម្រាប់លទ្ធផល បើសិនជាក្រុមប្រេស៊ីលនៅរក្សាលេខ១ក្នុងពូល G នឹងត្រូវប៉ះក្រុមលេខ២ក្នុងពូល H ខណៈដែលក្រុមលេខ២ក្នុងពូល G នឹងត្រូវប៉ះលេខ១ក្នុងពូល H វិញនៅវគ្គ១៦ក្រុមចុងក្រោយ ៕
ដោយ៖ ភារៈ(រូបភាព ៖ soccerway.com)
