សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ យោងតាមការបញ្ជាក់ពីប្រភពព័ត៌មានស្នងការដ្ឋាននគរបាលខេត្តព្រះសីហនុ នៅព្រឹកថ្ងៃសៅរ៍ទី០៩ ខែកញ្ញា ឆ្នាំ២០២៣ បានបង្ហាញមុខក្រុមចោរឆក់ និងលួចកាច់កបំបែកសោកម៉ូតូប្រជាពលរដ្ឋយ៉ាងសកម្ម នៅក្នុងភូមិសាស្ត្រក្រុង-ខេត្តព្រះសីហនុ គឺសុទ្ធតែបុគ្គលិកក្រុមដឹកជញ្ជូនអីវ៉ាន់ល្បីរបស់ក្រុមហ៊ុនដូចជា៖ foodpanda, Wow Now,និង E-Gets ក្រោយកម្លាំងជំនាញក្រុងព្រះសីហនុ ចុះស្រាវជ្រាវរហូតឈានដល់ការបង្រ្កាប និងឃាត់ខ្លួនយកមកសាកសួរបញ្ចប់នីតិវិធី និងត្រៀមខ្លួនបញ្ជូនទៅកាន់សាលាដំបូងខេត្ត ដើម្បីចាត់ការតាមច្បាប់។
ប្រភពដដែលបន្តថា មានករណីអំពើលួចមានស្ថានទម្ងន់ទោស (ឆក់) មួយកើតឡើងបង្កដោយជនសង្ស័យចំនួន ២នាក់ ជិះម៉ូតូ ០១គ្រឿង ធ្វើសកម្មភាពឆក់កាបូប ស្រ្តីម្នាក់កំពុងដើរ តែមិនបានសម្រេច កាលពីថ្ងៃទី០១ ខែកញ្ញា ឆ្នាំ២០២៣ថ្មីៗនេះ។ ក្រោយពីទទួលបានដំណឹងនេះភ្លាម លោកឧត្តមសេនីយ៍ឯក ស រដ្ឋា អគ្គស្នងការរងនគរបាលជាតិ និងជាស្នងការនគរបាលខេត្តព្រះសីហនុ បានចាត់ឱ្យ កម្លាំងការិយាល័យនគរបាលព្រហ្មទណ្ឌកម្រិតធ្ងន់ ដឹកនាំបញ្ជាដោយ លោកឧត្តមសេនីយ៍ត្រី ណុប បញ្ញា ស្នងការរងទទួលផែនការងារព្រហ្មទណ្ឌ បានស្រាវជ្រាវយ៉ាងយកចិត្តទុកដាក់ ទើបកំណត់មុខសញ្ញាបាន ឈានដល់ការឃាត់ខ្លួនជនសង្ស័យខាងលើ បានចំនួន២នាក់ យកមកស្នងការដ្ឋាននគរបាលខេត្ត ដើម្បីសួរនាំ និងបានឃាត់ខ្លួនបក្ខពួកជាបន្តបន្ទាប់សរុបមានគ្នា ចំនួន ០៩នាក់ ។
វត្ថុតាងដែលដកហូតបាន (មធ្យោយបាយធ្វើសកម្មភាព) ៖
-ម៉ូតូម៉ាក SCOOPY CLUB ពណ៌ខ្មៅគ្រឺម ផលិតឆ្នាំ២០២១ ស្លាកលេខ ភ្នំពេញ1IU-9615
-ម៉ូតូម៉ាក HONDA DREAM ពណ៌ខ្មៅ ផលិតឆ្នាំ២០២២ ស្លាកលេខ កំពង់ចាម1AB-2194
-ម៉ូតូម៉ាក HONDA DREAM ពណ៌ខ្មៅ ផលិតឆ្នាំ២០២២ ស្លាកលេខ ព្រះសីហនុ1J-4185
-ម៉ូតូម៉ាក HONDA DREAM ពណ៌ក្រហម ផលិតឆ្នាំ២០២២ គ្មានស្លាកលេខ
-ម៉ូតូម៉ាក HONDA DREAM ពណ៌ខ្មៅ ផលិតឆ្នាំ២០២៣ គ្មានស្លាកលេខ ។
ដោយឡែកជុំវិញបញ្ហាជនសង្ស័យសុទ្ធតែជាបុគ្គលិកក្រុមហ៊ុនដឹកជញ្ជូនអីវ៉ាន់ល្បីរបស់ក្រុមហ៊ុនដូចជា៖ foodpanda, Wow Now,និង E-Getsនេះដែរ បានធ្វេីឱ្យប្រជាពលរដ្ឋអ្នកដែលចូលចិត្តទិញទំនិញនៅតាមប្រព័ន្ធអនឡាញ មានការព្រួយបារម្ភណ៍ ព្រោះពួកគាត់អាចធ្វេីឱ្យអតិថិជនប្រឈមនិងគ្រោះថ្នាក់ផងដែរ។
បច្ចុប្បន្នជនសង្ស័យខាងលើ នៅព្រឹកថ្ងៃទី០៩ ខែកញ្ញានេះ កម្លាំងការិយាល័យព្រហ្មទណ្ឌកម្រិតធ្ងន់ កំពុងកសាងសំណុំរឿងបញ្ជូនជនសង្ស័យ ទៅសាលាដំបូងខេត្តព្រះសីហនុ ដើម្បីចាត់ការតាមនីតិវិធី៕
ដោយ៖សហការី
