សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និជាប្រធានសហភាពសហព័ន្ធយុវជនកម្ពុជា នៅល្ងាចថ្ងៃទី០១ ខែវិច្ឆិកា ឆ្នាំ២០២៣នេះតាមរយៈបណ្ដាញសង្គមហ្វេសប៊ុកផ្លូវការរបស់ខ្លូនយ៉ាងដូច្នេះថា៖ ថ្ងៃនេះ ខ្ញុំមានសេចក្តីសោមនស្សដែលបានជួបសំណេះសំណាល និងថ្លែងអំណរគុណដោយផ្ទាល់ចំពោះលោកគ្រូ អ្នកគ្រូ ដែលបានចូលរួមផលិតមាតិកាវីដេអូបង្រៀន សម្រាប់កម្មវិធីបង្រៀនតាមទូរស័ព្ទ MoEYS E-Learning App។
លោករដ្ឋមន្ត្រី បានថ្លែងបន្តថា ខ្ញុំសូមថ្លែងអំណរគុណដល់លោកគ្រូ អ្នកគ្រូ គណៈគ្រប់គ្រង ក៏ដូចជាភាគីពាក់ព័ន្ធទាំងអស់ ចំពោះកិច្ចខិតខំប្រឹងប្រែង និងការលះបង់ក្នុងការចូលរួមក្នុង គម្រោងនេះ ដែលបានធ្វើឱ្យកម្មវិធីទូរស័ព្ទ MoEYS E-Learning App ទទួលការគាំទ្រពីសិស្សានុសិស្ស ដែលស្តែងចេញតាមរយៈចំនួនដោនឡូដ មានរហូតដល់ ៣៧ ម៉ឺននាក់។
លោក ហ៊ុន ម៉ានី បានបញ្ជាក់បន្ថែមទៀតថា ពិតណាស់ ភាពជោគជ័យរបស់ MoEYS E-Learning App គឺកើតចេញពីកត្តារួមផ្សំ ចំនួន៣ ដែលទីមួយគឺ ការចាប់ផ្តើមជាគំនិត និងការគាំទ្រជាឆន្ទៈ ក្រោមកិច្ចសហការរវាងក្រសួងអប់រំ យុវជន និងកីឡា និងសហភាពសហព័ន្ធយុវជនកម្ពុជា។
កត្តាទី២ គឺការចូលរួមកម្រិតបច្ចេកទេសរបស់ក្រុមការងារដែលមកពីមជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយ នៃក្រសួងអប់រំយុវជន និងកីឡា ជាមួយនឹងមូលនិធិនៃការកសាងសមត្ថភាព និង ការស្រាវជ្រាវ និងការអភិវឌ្ឍលើវិស័យទូរគមនាគមន៍ និង បច្ចេកវិទ្យាគមនាគមន៍ និងព័ត៌មាន នៃក្រសួងប្រៃសណីយ៍ និងទូរគមនាគមន៍។
កត្តាទី៣ គឺការគាំទ្រមិនអាចខ្វះបានពីសំណាក់គណៈគ្រប់គ្រង លោកគ្រូ អ្នកគ្រូ ដែលបានលះបង់ពេលវេលា ចូលរួមផលិតមាតិកាបង្រៀន៕
ដោយ៖ សហការី
